ಚಂದ್ರಯಾನ - 4 ಇಳಿಸಲು ಜಾಗ ನಿರ್ಧಾರ : ಇಸ್ರೋ

ಬೆಂಗಳೂರು: ಭಾರತೀಯ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ (ಇಸ್ರೋ) ತನ್ನ ಮಹತ್ವಾಕಾಂಕ್ಷಿ ಚಂದ್ರಯಾನ-4 ಯೋಜನೆಯ ಭಾಗವಾಗಿ ಲ್ಯಾಂಡರ್ ಇಳಿಸಲು ಚಂದ್ರನ ದಕ್ಷಿಣ ಧ್ರುವ ಪ್ರದೇಶದಲ್ಲಿ ಸ್ಥಳವನ್ನು ನಿರ್ಧರಿಸಿದೆ. ಈ ಯೋಜನೆಯನ್ನು ಇಸ್ರೋ 2028ರಲ್ಲಿ ಕೈಗೊಳ್ಳಲಿದೆ ಎಂದು ಈಗಾಗಲೇ ಘೋಷಿಸಲಾಗಿದೆ. “ಚಂದ್ರನ ಮೇಲಿನ ‘ಮ್ಯಾನ್ಸ್ ಮೌಂಟನ್’ ಪರ್ವತದಲ್ಲಿ ಎಂಎಂ1, ಎಂಎಂ3, ಎಂಎಂ4, ಎಂಎಂ5 ಪ್ರದೇಶಗಳಿವೆ. ಹೆಚ್ಚಿನ ರೆಸಲ್ಯೂಶನ್ ಕ್ಯಾಮೆರಾ ಬಳಸಿ ಈ ಪ್ರದೇಶಗಳನ್ನು ಪರಿಶೀಲಿಸಿದಾಗ, ಚಂದ್ರಯಾನ-4 ಲ್ಯಾಂಡರ್‌ಗೆ ಎಂಎಂ4 ಪ್ರದೇಶ ಅತ್ಯುತ್ತಮವಾಗಿದೆ ಎಂದು ನಿರ್ಧರಿಸಲಾಗಿದೆ.

 ಈ ಪ್ರದೇಶದಲ್ಲಿ ಅಪಾಯಗಳ ಸಾಧ್ಯತೆ ಕಡಿಮೆ, ನೆಲ 5 ಡಿಗ್ರಿ ಇಳಿಜಾರಿನ ಮಟ್ಟದಲ್ಲಿ, ಸುತ್ತಲ ಪ್ರದೇಶದಿಂದ 5,334 ಮೀಟರ್ ಎತ್ತರದಲ್ಲಿದೆ ಮತ್ತು ಹೆಚ್ಚು ಸೂರ್ಯರಶ್ಮಿ ಪಡೆಯುವ ಸ್ಥಳವಾಗಿದೆ” ಎಂದು ಇಸ್ರೋ ಅಧಿಕಾರಿಗಳು ಹೇಳಿದ್ದಾರೆ. ಚಂದ್ರಯಾನ-4 ಭಾಗವಾಗಿ ಪ್ರೊಪಲ್ಷನ್ ಮಾಡ್ಯೂಲ್, ಡಿಸೆಂಡರ್ ಮಾಡ್ಯೂಲ್, ಆ್ಯಸೆಂಡರ್ ಮಾಡ್ಯೂಲ್, ಟ್ರಾನ್ಸ್‌ಫರ್ ಮಾಡ್ಯೂಲ್ ಮತ್ತು ರಿ-ಎಂಟ್ರಿ ಮಾಡ್ಯೂಲ್‌ಗಳು ಉಡಾವಣೆಯಾಗಲಿವೆ. 2023 ಅ. 23ರಂದು, ಚಂದ್ರಯಾನ-3 ಚಂದ್ರನ ದಕ್ಷಿಣ ಧ್ರುವದಲ್ಲಿ ಯಶಸ್ವಿಯಾಗಿ ಇಳಿದಿದ್ದು, ಆ ಪ್ರದೇಶದಲ್ಲಿ ಸಾಫ್ಟ್ ಲ್ಯಾಂಡಿಂಗ್ ಮಾಡಿದ ಮೊದಲ ರಾಷ್ಟ್ರವಾಗಿ ಭಾರತವನ್ನು ಹೆಸರು ಮಾಡಿಸಿದೆ.