പാലം തുറക്കണമെങ്കിൽ പാതി ഉടമസ്ഥാവകാശം വേണം!; കാനഡയെ ‘വിറപ്പിച്ച്’ ട്രംപിന്റെ പുതിയ അന്ത്യശാസനം

ഡെട്രോയിറ്റ്∙ അമേരിക്കയെയും കാനഡയെയും ബന്ധിപ്പിക്കുന്ന ഡെട്രോയിറ്റ് നദിക്ക് കുറുകെയുള്ള പുതിയ ഗോർഡി ഹോവ് ഇന്റർനാഷനൽ ബ്രിജിന്റെ ഉദ്ഘാടനം തടയുമെന്ന ഭീഷണിയുമായി പ്രസിഡന്റ് ഡോണൾഡ് ട്രംപ് രംഗത്തെത്തി. കാനഡ പൂർണ്ണമായും ധനസഹായം നൽകി നിർമിച്ച ഈ പാലം തുറന്നുനൽകുന്നതിന് മുൻപായി അതിന്റെ പകുതി ഉടമസ്ഥാവകാശം അമേരിക്കയ്ക്ക് നൽകണമെന്നാണ് ട്രംപിന്റെ വിചിത്രമായ ആവശ്യം. കാനഡ അമേരിക്കയെ വ്യാപാരപരമായി ചൂഷണം ചെയ്യുകയാണെന്നും, പകരമായി ഈ പാലത്തിന്റെ നിയന്ത്രണം അമേരിക്കയ്ക്ക് ലഭിക്കണമെന്നും അദ്ദേഹം സോഷ്യൽ മീഡിയയിലൂടെ വ്യക്തമാക്കി.

ട്രംപിന്റെ ഈ പ്രഖ്യാപനം ഇരുരാജ്യങ്ങളും തമ്മിലുള്ള നയതന്ത്ര ബന്ധത്തിൽ വലിയ വിള്ളലുകൾ വീഴ്ത്തിയിരിക്കുകയാണ്. പാലം നിർമാണത്തിനായി അമേരിക്കൻ ഉരുക്ക് ഉപയോഗിച്ചില്ലെന്നും മുൻ ഭരണകൂടങ്ങൾ കാനഡയ്ക്ക് അനാവശ്യമായ ഇളവുകൾ നൽകിയെന്നും അദ്ദേഹം ആരോപിക്കുന്നു.