Government Approves: 25 ಲಕ್ಷ ಟನ್ ಗೋಧಿ ರಫ್ತಿಗೆ ಕೇಂದ್ರ ಸರ್ಕಾರದ ಗ್ರೀನ್ ಸಿಗ್ನಲ್!

ನವದೆಹಲಿ: ದೇಶದಲ್ಲಿ ಗೋಧಿ ಮತ್ತು ಸಕ್ಕರೆಯ ದಾಸ್ತಾನು ಸಮರ್ಪಕವಾಗಿರುವ ಹಿನ್ನೆಲೆಯಲ್ಲಿ ರೈತರಿಗೆ ಲಾಭದಾಯಕ ಬೆಲೆ ಒದಗಿಸುವ ನಿಟ್ಟಿನಲ್ಲಿ ಕೇಂದ್ರ ಸರ್ಕಾರ ಮಹತ್ವದ ನಿರ್ಧಾರ ಕೈಗೊಂಡಿದೆ. 25 ಲಕ್ಷ ಟನ್ ಗೋಧಿ ಹಾಗೂ 5 ಲಕ್ಷ ಟನ್ ಸಕ್ಕರೆ ಉತ್ಪನ್ನಗಳ ರಫ್ತಿಗೆ ಶುಕ್ರವಾರ ಅನುಮತಿ ನೀಡಿದೆ. ರಫ್ತು ನಿರ್ಧಾರಕ್ಕೆ ಕಾರಣವೇನು? ದೇಶೀಯ ಮಾರುಕಟ್ಟೆಯಲ್ಲಿ ಬೆಲೆ ಸ್ಥಿರತೆಯನ್ನು ಕಾಯ್ದುಕೊಳ್ಳುವುದು ಮತ್ತು ರೈತರು ತಮ್ಮ ಬೆಳೆಗಳಿಗೆ ಉತ್ತಮ ಬೆಲೆ ಪಡೆಯುವುದನ್ನು ಖಚಿತಪಡಿಸಿಕೊಳ್ಳಲು ಈ ಕ್ರಮ ಕೈಗೊಳ್ಳಲಾಗಿದೆ ಎಂದು ಆಹಾರ ಸಚಿವಾಲಯ ತಿಳಿಸಿದೆ. 

ಪ್ರಸಕ್ತ ಸಾಲಿನಲ್ಲಿ ಗೋಧಿಯ ಲಭ್ಯತೆ ಉತ್ತಮವಾಗಿದ್ದು, ಖಾಸಗಿ ಸಂಸ್ಥೆಗಳ ಬಳಿ ಸುಮಾರು 75 ಲಕ್ಷ ಟನ್ ಗೋಧಿ ದಾಸ್ತಾನಿದೆ. ಇದು ಕಳೆದ ವರ್ಷಕ್ಕೆ ಹೋಲಿಸಿದರೆ 32 ಲಕ್ಷ ಟನ್ ಹೆಚ್ಚು. ರಫ್ತಿಗೆ ಅವಕಾಶ ನೀಡಿದರೂ ದೇಶದ ಆಹಾರ ಭದ್ರತೆಗೆ ಯಾವುದೇ ತೊಂದರೆಯಾಗುವುದಿಲ್ಲ ಎಂದು ಸರ್ಕಾರ ಸ್ಪಷ್ಟಪಡಿಸಿದೆ.ಏ. 1, 2026ರ ವೇಳೆಗೆ ಭಾರತೀಯ ಆಹಾರ ನಿಗಮದ (FCI) ಬಳಿ 182 ಲಕ್ಷ ಟನ್ ಗೋಧಿ ಲಭ್ಯವಿರುವ ನಿರೀಕ್ಷೆಯಿದೆ. ಈ ಬಾರಿ ರಬಿ ಹಂಗಾಮಿನಲ್ಲಿ 334.17 ಲಕ್ಷ ಹೆಕ್ಟೇರ್ ಪ್ರದೇಶದಲ್ಲಿ ಗೋಧಿ ಬಿತ್ತನೆಯಾಗಿದ್ದು, ಕಳೆದ ವರ್ಷಕ್ಕಿಂತ (328.04 ಲಕ್ಷ ಹೆಕ್ಟೇರ್) ಹೆಚ್ಚಾಗಿದೆ. ಇದು ಮುಂದಿನ ದಿನಗಳಲ್ಲಿ ಬಂಪರ್ ಇಳುವರಿಯ ಮುನ್ಸೂಚನೆ ನೀಡಿದೆ.
ಸಕ್ಕರೆ ರಫ್ತಿಗೂ ಉತ್ತೇಜನ ಸಕ್ಕರೆ ಕಾರ್ಖಾನೆಗಳ ಬಳಿ ಇರುವ ಹೆಚ್ಚುವರಿ ದಾಸ್ತಾನನ್ನು ನಿರ್ವಹಿಸಲು ಹೆಚ್ಚುವರಿ 5 ಲಕ್ಷ ಟನ್ ಸಕ್ಕರೆ ರಫ್ತಿಗೆ ಸರ್ಕಾರ ಒಪ್ಪಿಗೆ ನೀಡಿದೆ.ಹಂಚಿಕೆಯಾದ ಕೋಟಾದಲ್ಲಿ ಕನಿಷ್ಠ ಶೇ. 70ರಷ್ಟನ್ನು ಜೂ. 30, 2026ರೊಳಗೆ ರಫ್ತು ಮಾಡಬೇಕೆಂಬ ಷರತ್ತನ್ನು ವಿಧಿಸಲಾಗಿದೆ. 2025ರ ನವೆಂಬರ್‌ನಲ್ಲಿ 15 ಲಕ್ಷ ಟನ್ ಸಕ್ಕರೆ ರಫ್ತಿಗೆ ಅನುಮತಿ ನೀಡಲಾಗಿತ್ತು. ಆದರೆ ಜನವರಿ ಅಂತ್ಯದವರೆಗೆ ಕೇವಲ 1.97 ಲಕ್ಷ ಟನ್ ಮಾತ್ರ ರಫ್ತಾಗಿದೆ. ಮಾರುಕಟ್ಟೆಗೆ ಬೆಳೆ ಬರುವ ಸಮಯದಲ್ಲಿ ಬೆಲೆ ಕುಸಿತವಾಗುವುದನ್ನು ತಡೆಯಲು ಮತ್ತು ರೈತರು ನಷ್ಟ ಅನುಭವಿಸದಂತೆ ನೋಡಿಕೊಳ್ಳಲು ಈ ರಫ್ತು ನೀತಿ ಸಹಕಾರಿಯಾಗಲಿದೆ ಎಂದು ಸಚಿವಾಲಯ ತನ್ನ ಪ್ರಕಟಣೆಯಲ್ಲಿ ತಿಳಿಸಿದೆ.