பெங்களூரு சின்னசாமி மைதானத்தில் ஐபிஎல் 2026 தொடரின் போட்டிகளை நடத்த கர்நாடக அரசு அனுமதி!

பெங்களூரு: ஐபிஎல் 2026 சீசன் தொடங்கவுள்ள நிலையில், ராயல் சேலஞ்சர்ஸ் பெங்களூரு ரசிகர்களுக்கு ஒரு உற்சாகமான செய்தி வெளியாகியுள்ளது. பெங்களூருவின் புகழ்பெற்ற எம். சின்னசாமி ஸ்டேடியத்தில் இந்த ஆண்டு போட்டிகளை நடத்த கர்நாடக அரசு அதிகாரப்பூர்வமாக அனுமதி வழங்கியுள்ளது. இன்று விதான் சௌதாவில் மாநில உள்துறை அமைச்சர் ஜி. பரமேஸ்வரா தலைமையில் நடைபெற்ற உயர்மட்ட ஆலோசனைக் கூட்டத்தில் இந்த முக்கிய முடிவு எடுக்கப்பட்டது. இதில் கர்நாடக மாநில கிரிக்கெட் சங்கம் மற்றும் ஆர்சிபி நிர்வாகத்தின் பிரதிநிதிகள் கலந்துகொண்டு பாதுகாப்பு ஏற்பாடுகள் குறித்த அறிக்கையைச் சமர்ப்பித்தனர். 

இதனை முழுமையாக ஆய்வு செய்த பின்னரே, போட்டிகளைத் தடையின்றி நடத்த அரசு பச்சைக்கொடி காட்டியுள்ளது. இந்த சீசனின் நடப்பு சாம்பியனான ஆர்சிபி, தனது முதல் போட்டியை மார்ச் 28-ம் தேதி சன்ரைசர்ஸ் ஹைதராபாத் அணிக்கு எதிராகத் தனது சொந்த மண்ணிலேயே விளையாட உள்ளது. மேலும், ரசிகர்கள் ஆவலோடு எதிர்பார்க்கும் ஆர்சிபி மற்றும் சென்னை சூப்பர் கிங்ஸ் அணிகளுக்கு இடையிலான மிக முக்கியமான போட்டி ஏப்ரல் 5-ம் தேதி இதே மைதானத்தில் நடைபெறவிருப்பது கூடுதல் சிறப்பாகும்.

இந்த சீசனில் ஆர்சிபி விளையாடும் தனது 7 ஹோம் மேட்ச்களில், 5 போட்டிகள் பெங்களூரு சின்னசாமி மைதானத்திலும், மீதமுள்ள 2 போட்டிகள் ராய்ப்பூரில் உள்ள ஷஹீத் வீர் நாராயண் சிங் ஸ்டேடியத்திலும் நடைபெறவுள்ளன.