నేపాల్‎లో భూకంపం.. రిక్టర్ స్కేల్‎పై 4.1 తీవ్రత నమోదు

ఖాఠ్మాండు: భారత పొరుగు దేశం నేపాల్‎లో భూకంపం సంభవించింది. రిక్టర్ స్కేల్‎పై భూకంప తీవ్రత 4.1గా నమోదు అయ్యింది. గురువారం (మార్చి 26) సుదూరపశ్చిమ్ ప్రావిన్స్‌లోని దార్చులా జిల్లా మురై ప్రాంతంలో భూ ప్రకంపనలు సంభవించినట్లు నేపాల్ జాతీయ భూకంప పర్యవేక్షణ, పరిశోధన కేంద్రం వెల్లడించింది.

ఈ భూ ప్రకంపనల ప్రభావం పక్కనే ఉన్న బైతాడి, బఝాంగ్ జిల్లాల్లో కూడా కనిపించిందని తెలిపారు. ఒక్కసారిగా భూమి కంపించడంతో ప్రజలు భయాందోళనకు గురై ఇళ్ల నుంచి బయటకు పరుగులు తీశారు. వెంటనే అప్రమత్తమైన ప్రభుత్వం యంత్రాగం సహయక చర్యలు చేపట్టింది. అయితే, ఈ భూకంపం వల్ల ఎలాంటి నష్టం జరిగినట్లు తక్షణ నివేదికలు లేవు.

నేపాల్ భూకంపాలు ఎక్కువగా సంభవించే టెక్టోనిక్ జోన్‌లలో (భూకంప జోన్‌లు IV, V) ఉంది. దీంతో ఈ హిమాలయ దేశంలో తరుచూ భూకంపాలు సంభవిస్తుంటాయి. ప్రపంచంలో అత్యంత భూకంప ముప్పు ఉన్న దేశాలలో నేపాల్ 11వ స్థానంలో ఉంది. 2015లో నేపాల్‎లో సంభవించిన ఒక వినాశకరమైన భూకంపం దాదాపు 9 వేల మంది ప్రాణాలను బలిగొంది. 7.8 తీవ్రతతో సంభవించిన ఈ భూకంప ధాటికి 22 వేల మందికి పైగా గాయపడగా.. 28 లక్షల మందిని నిరాశ్రయులయ్యారు. ఇళ్ళు, పాఠశాలలు, రోడ్లు, శతాబ్దాల నాటి వారసత్వ ప్రదేశాలు శిథిలాల కుప్పగా మారాయి.