Eylon Levy: ಪಾಕಿಸ್ತಾನ ಒಂದು ಆಕ್ರಮಣಕಾರಿ ದೇಶ, ಭಾರತಕ್ಕೂ ಅಪಾಯವಿದೆ: ಇಸ್ರೇಲ್ ಮಾಜಿ ವಕ್ತಾರ ಎಚ್ಚರಿಕೆ

ಇಸ್ರೇಲ್ 'ಮಾನವೀಯತೆಗೆ ಶಾಪ ಮತ್ತು ದುಷ್ಟ ಶಕ್ತಿ' ಎಂದು ಪಾಕಿಸ್ತಾನದ ರಕ್ಷಣಾ ಸಚಿವ ಖ್ವಾಜಾ ಆಸಿಫ್ ನೀಡಿದ್ದ ಹೇಳಿಕೆಯನ್ನು ಇಸ್ರೇಲ್‌ನ ಮಾಜಿ ವಕ್ತಾರ ಐಲಾನ್ ಲೆವಿ ತೀವ್ರವಾಗಿ ಖಂಡಿಸಿದ್ದಾರೆ. ಶುಕ್ರವಾರ ANI ಸುದ್ದಿ ಸಂಸ್ಥೆಯೊಂದಿಗೆ ಮಾತನಾಡಿದ ಅವರು, ಈ ಹೇಳಿಕೆ ಸಂಪೂರ್ಣವಾಗಿ ಒಪ್ಪಲಾಗದ್ದು ಎಂದಿದ್ದಾರೆ. ಪಾಕಿಸ್ತಾನದ ರಕ್ಷಣಾ ಸಚಿವರ ಹೇಳಿಕೆ ಆಘಾತಕಾರಿ ಮತ್ತು ಸ್ವೀಕಾರಾರ್ಹವಲ್ಲ. ಅಣ್ವಸ್ತ್ರ ಹೊಂದಿರುವ ಒಂದು ದೇಶ ನಮ್ಮನ್ನು ನಾಶಮಾಡಲು ಕರೆ ನೀಡುತ್ತಿದೆ ಎಂದು ಇಸ್ರೇಲ್ ಇದನ್ನು ಅರ್ಥೈಸಿಕೊಂಡಿದೆ. ಪಾಕಿಸ್ತಾನವು ಒಳ್ಳೆಯ ದೇಶವಲ್ಲ ಎಂಬುದು ಹೆಚ್ಚಿನ ಭಾರತೀಯರಿಗೆ ತಿಳಿದಿರುವ ಸತ್ಯ. ಈಗ ಅದೇ ಸತ್ಯ ಇಸ್ರೇಲಿಗರಿಗೂ ನೆನಪಾಗುತ್ತಿದೆ. ಪಾಕಿಸ್ತಾನವು ವ್ಯವಸ್ಥಿತವಾಗಿ ಭಯೋತ್ಪಾದನೆಗೆ ಬೆಂಬಲ ನೀಡುವ ಒಂದು ಆಕ್ರಮಣಕಾರಿ ದೇಶ ಎಂದು ಅವರು ಹೇಳಿದ್ದಾರೆ.
ಪಾಕಿಸ್ತಾನವು ಇಸ್ರೇಲ್ ಮತ್ತು ಭಾರತ ಎರಡಕ್ಕೂ ಅಪಾಯವನ್ನುಂಟುಮಾಡುವ 'ತೀವ್ರವಾದಿ ಇಸ್ಲಾಮಿಕ್ ಒಕ್ಕೂಟ'ವನ್ನು ನಿರ್ಮಿಸಲು ಪ್ರಯತ್ನಿಸುತ್ತಿದೆ ಎಂದು ಲೆವಿ ಆರೋಪಿಸಿದ್ದಾರೆ. ಇರಾನ್ ಜೊತೆಗಿನ ಮಾತುಕತೆಯಲ್ಲಿ ಪಾಕಿಸ್ತಾನವು ಪ್ರಾಮಾಣಿಕ ಮಧ್ಯವರ್ತಿಯಲ್ಲ. ಅದು ಇರಾನ್‌ನ ಮಿತ್ರರಾಷ್ಟ್ರ. ಪಾಕಿಸ್ತಾನಕ್ಕೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಸಿಗುತ್ತಿರುವ ಹೆಚ್ಚಿನ ಪಾತ್ರದ ಬಗ್ಗೆ ಭಾರತೀಯರು ಹೆಚ್ಚು ಚಿಂತಿತರಾಗಬೇಕು ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.