ദേശീയ പതാകയോടുള്ള ആദരം; ത്രിവർണ്ണ റിബ്ബൺ മുറിക്കാതെ ഒമർ അബ്ദുള്ള; ജമ്മു കശ്മീർ മുഖ്യമന്ത്രിക്ക് കൈയടി

ശ്രീനഗര്‍: ദേശീയ പതാകയോടുള്ള ആദരസൂചകമായി, ത്രിവർണ്ണ നിറത്തിലുള്ള ഉദ്ഘാടന റിബ്ബൺ മുറിക്കാൻ വിസമ്മതിച്ച് ജമ്മു കശ്മീർ മുഖ്യമന്ത്രി ഒമർ അബ്ദുള്ള. ശ്രീനഗറിലെ കാശ്മീർ ഹാറ്റിൽ സംഘടിപ്പിച്ച കൈത്തറി കരകൗശല പ്രദർശന മേളയുടെ ഉദ്ഘാടനത്തിനിടെയാണ് നാടിന്റെ പ്രശംസ പിടിച്ചുപറ്റിയ ഈ സംഭവം നടന്നത്. ഇന്ത്യൻ ദേശീയ പതാകയുടെ നിറങ്ങളോടു കൂടിയ റിബ്ബൺ മുറിക്കുന്നത് പതാകയെ അവഹേളിക്കുന്നതിന് തുല്യമാണെന്ന് നിരീക്ഷിച്ചാണ് മുഖ്യമന്ത്രി തന്റെ നിലപാട് വ്യക്തമാക്കിയത്. ഭരണാധികാരി എന്ന നിലയിൽ ദേശീയ ചിഹ്നങ്ങളോടും ചിഹ്നങ്ങളുടെ നിറങ്ങളോടും പുലർത്തേണ്ട ജാഗ്രത അദ്ദേഹം അവിടെ തെളിയിച്ചു. ‘നോ യുവർ ആർട്ടിസാൻ’ (Know Your Artisan) എന്ന പേരിൽ കാശ്മീരിലെ കരകൗശല തൊഴിലാളികളെ പ്രോത്സാഹിപ്പിക്കുന്നതിനായാണ് പ്രദർശന മേള സംഘടിപ്പിച്ചത്. ഉദ്ഘാടനത്തിനായി കെട്ടിയിരുന്ന നാട ത്രിവർണ്ണ നിറത്തിലുള്ളതാണെന്ന് ശ്രദ്ധയിൽപ്പെട്ടതോടെ അദ്ദേഹം അത് മുറിക്കാൻ വിസമ്മതിക്കുകയായിരുന്നു. റിബ്ബൺ മുറിക്കുന്നതിന് പകരം ഇരുവശത്തുനിന്നും അത് അഴിച്ചുമാറ്റാൻ അദ്ദേഹം ഉദ്യോഗസ്ഥരോട് നിർദ്ദേശിച്ചു. അഴിച്ചെടുത്ത ത്രിവർണ്ണ നാട ആദരവോടെ മടക്കി സുരക്ഷിതമായി സൂക്ഷിക്കണമെന്നും സംഘാടകർക്ക് അദ്ദേഹം കർശന നിർദ്ദേശം നൽകി.

സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിച്ചതോടെ വലിയ രീതിയിലുള്ള പിന്തുണയാണ് ഒമർ അബ്ദുള്ളയ്ക്ക് ലഭിക്കുന്നത്. വാക്കുകളിലല്ല, പ്രവൃത്തിയിലാണ് യഥാർത്ഥ രാജ്യസ്നേഹം എന്ന് പലരും മുഖ്യമന്ത്രിയുടെ നടപടിയെ പുകഴ്ത്തിക്കൊണ്ട് കുറിച്ചു. ഉപമുഖ്യമന്ത്രി സുരീന്ദർ ചൗധരി, മുഖ്യമന്ത്രിയുടെ ഉപദേഷ്ടാവ് നാസിർ അസ്ലം വാനി എന്നിവരും ഈ സമയത്ത് അദ്ദേഹത്തോടൊപ്പമുണ്ടായിരുന്നു. ദേശീയ പതാകയോടുള്ള മുഖ്യമന്ത്രിയുടെ കരുതൽ വടക്കൻ സംസ്ഥാനങ്ങളിൽ വലിയ വാർത്താ പ്രാധാന്യം നേടിയിരിക്കുകയാണ്.

ഔദ്യോഗിക ചടങ്ങുകളിൽ ദേശീയ പതാകയുടെ നിറങ്ങൾ അശ്രദ്ധമായി ഉപയോഗിച്ച സംഘാടകർക്കെതിരെ വിമർശനവും ഉയരുന്നുണ്ട്. ഇത്തരം ചെറിയ കാര്യങ്ങൾ പോലും ശ്രദ്ധിക്കേണ്ടത് ഭരണകൂട സംവിധാനങ്ങളുടെ ഉത്തരവാദിത്തമാണെന്ന് സോഷ്യൽ മീഡിയയിൽ പലരും അഭിപ്രായപ്പെട്ടു. റിബ്ബൺ മുറിച്ചില്ലെങ്കിലും മേളയുടെ മറ്റ് ചടങ്ങുകളെല്ലാം നിശ്ചയിച്ച പ്രകാരം തന്നെ നടന്നു. കാശ്മീരിലെ പാരമ്പര്യ കലകളെയും കൈത്തറി മേഖലയെയും ജനങ്ങളിലേക്ക് എത്തിക്കാൻ ലക്ഷ്യമിട്ടുള്ള പ്രദർശനം രണ്ട് ദിവസമാണ് നീണ്ടുനിൽക്കുന്നത്.