கைரேகை பார்த்து பலன் சொல்லும் ChatGPT

சென்னை: கைரேகை பார்த்து நம் ஊர் ஜோசியர்கள் போல பலன் சொல்கிறது ஓபன் ஏஐ நிறுவனத்தின் ஜெனரேட்டிவ் ஏஐ சாட்பாட் ஆன ‘சாட்ஜிபிடி’. இது குறித்து பலரும் ஏற்கெனவே அறிந்திருக்கலாம். இப்போது மீண்டும் இது பேசு பொருளாகி உள்ளது. ‘டிமாண்டி காலனி’ பாகம் ஒன்றில் ‘அப்போ என் திருமண வாழ்க்கை?’ என்று ஜோசியராக வரும் நடிகர் எம்.எஸ்.பாஸ்கரிடம், நடிகர் ரமேஷ் திலக் கேட்பார். அந்த காட்சி நகைச்சுவையாக இருக்கும் வகையில் இயக்குநர் அஜய் ஞானமுத்து இயக்கி இருப்பார். அதுபோல நிஜ வாழக்கையிலும் சிலருக்கு அனுபவம் கிடைத்திருக்கும். இப்போது கைரேகை பார்த்து பலன் சொல்லும் பணியை சாட்ஜிபிடி செய்கிறது.

வழக்கம் போலவே சாட்ஜிபிடி ஏஐ சாட்டில் அதன் பயனர்கள் தங்கள் உள்ளங்கையின் படத்தை அப்லோட் செய்து, ‘எனது கைரேகையை படித்து சொல்’ என்று ப்ராம்ப்ட் (Prompt) கொடுத்தால் போதும். அடுத்த சில வினாடிகளில் பலனை சொல்கிறது ChatGPT. இதை கைரேகை சாஸ்திர பாணியிலான விளக்கமாக அந்த ஏஐ பாட் தருகிறது. இதில் ஆயுள், குணாதிசயம், பணிவாய்ப்பு, திருமணம் குறித்து கணிப்புகளை வழங்குகிறது. “கைரேகை உங்கள் எதிர்காலத்தை நிர்ணயிப்பதில்லை. அது உங்கள் இயல்புகளையே பிரதிபலிக்கிறது. எந்தவொரு விஷயத்திலும் விடாமுயற்சியும் பொறுமையும் இருந்தால் அதன் விளைவு உங்களுக்கு நலன் சேர்க்கும்”, “உங்கள் எதிர்காலம் உங்கள் கைகளிலேயே உள்ளது” என்று இதன் இறுதியில் ChatGPT டிஸ்க்ளைமர் தருகிறது. அது சொல்வது போலவே பலரும் ஏஐ சாட்பாட்களுடன் வேடிக்கையாக தினமும் அளவளாவுவது உண்டு. அதுபோல இதையும் வேடிக்கையானதாக அணுக வேண்டும்.

சாட்ஜிபிடி? - தொழில்நுட்ப சாதனங்களின் வழியே பயனர்களோடு உரையாடும் தன்மை கொண்ட சாட்பாட் தான் சாட்ஜிபிடி. இதனை ஓப்பன் ஏஐ நிறுவனம் வடிவமைத்துள்ளது. இந்நிறுவனத்தை கடந்த 2015 வாக்கில் எலான் மஸ்க், சாம் ஆல்ட்மேன் மற்றும் சிலர் இணைந்து தொடங்கினர். இது செயற்கை நுண்ணறிவு பெற்ற பிளாட்பார்ம். இதில் பயனர்கள் கேட்கிற கேள்விகள் அனைத்துக்கும் விடை கிடைக்கும். கடந்த 2022-ம் ஆண்டின் இறுதியில் ஓபன் ஏஐ நிறுவனம் சாட்ஜிபிடி ஜெனரேட்டிவ் ஏஐ சாட்பாட்டை பொது பயன்பாட்டுக்கு அறிமுகம் செய்தது. அது டிஜிட்டல் பயனர்கள் மத்தியில் அதீத வரவேற்பைப் பெற்றது. கிட்டத்தட்ட ஜெனரேட்டிவ் ஏஐ பயன்பாடு சார்ந்த புரட்சியை அது ஏற்படுத்தியது. கதையைச் சொல்ல, கட்டுரை படிக்க, பாடல் எழுத என பயனர்கள் கேட்கும் சகல கேள்வி மற்றும் சந்தேகங்களுக்கும் இதில் பதில் கிடைக்கும். இதன் மூலம் படங்களையும் ஜெனரேட் செய்யலாம்.