വന്ദേമാതരം മദ്രസയിലും സ്കൂളിലും ആലപിക്കണം; നിര്ദേശം നല്കി ബംഗാള് സര്ക്കാര്
സംസ്ഥാനത്തെ എല്ലാ സർക്കാർ, എയ്ഡഡ്, അംഗീകൃത മദ്രസകളിലും സർക്കാർ സ്കൂളുകളിലും പ്രഭാത അസംബ്ലിയിൽ "വന്ദേ മാതരം" നിർബന്ധമായും ആലപിക്കണമെന്ന് പശ്ചിമ ബംഗാൾ സർക്കാർ ഉത്തരവിട്ടു. ക്ലാസുകൾ ആരംഭിക്കുന്നതിന് മുമ്പ് എല്ലാ ദിവസവും വിദ്യാർത്ഥികൾ ദേശീയ ഗീതം ആലപിക്കണമെന്നാണ് പുതിയ നിർദ്ദേശം. ഈ തീരുമാനം ഉടൻ പ്രാബല്യത്തിൽ വരുമെന്നും അധികൃതർ അറിയിച്ചു.
സ്കൂൾ വിദ്യാഭ്യാസ വകുപ്പ് പുറത്തിറക്കിയ വിജ്ഞാപനത്തിലൂടെയാണ് ഇത് സംബന്ധിച്ച നിർദ്ദേശങ്ങൾ നൽകിയത്. ദൈനംദിന നടപടികൾ കർശനമായി പാലിക്കുന്നുണ്ടെന്ന് ഉറപ്പാക്കാനും എല്ലാ സ്ഥാപനങ്ങൾക്കും നിർദ്ദേശം നൽകിയിട്ടുണ്ട്. പ്രഭാത പ്രാർത്ഥനയുടെ ഭാഗമായി ഈ ആലാപനം ഉടനടി ഉൾപ്പെടുത്താനാണ് സ്കൂൾ അധികൃതർക്ക് ലഭിച്ച നിർദ്ദേശം.
"ക്ലാസുകൾ ആരംഭിക്കുന്നതിന് മുമ്പുള്ള പ്രഭാത അസംബ്ലി പ്രാർത്ഥനകളിൽ വന്ദേ മാതരം ആലപിക്കുന്നത് നിർബന്ധമാക്കണം, അതുവഴി സംസ്ഥാനത്തെ എല്ലാ സ്കൂളുകളിലെയും വിദ്യാർത്ഥികൾ വന്ദേ മാതരം ഉടനടി ആലപിക്കുന്നുണ്ടെന്ന് ഉറപ്പാക്കുക" എന്ന് വിജ്ഞാപനത്തിൽ പറയുന്നു. അതേസമയം, മിക്ക മദ്രസകളിലും "വന്ദേ മാതരം" നിർബന്ധമാക്കിക്കൊണ്ട് മദ്രസ ഡയറക്ടറേറ്റ് സർക്കുലർ പുറത്തിറക്കിയിട്ടുണ്ട്.
ചില സ്കൂളുകൾ ഈ ഉത്തരവ് ഇതിനകം നടപ്പാക്കിത്തുടങ്ങിയതായി അറിയിച്ചു. ജാദവ്പൂർ വിദ്യാപീഠം ഹെഡ്മാസ്റ്റർ പാർത്ഥ പ്രതിം ബൈദ്യ, കഴിഞ്ഞയാഴ്ച മുതൽ ദേശീയ ഗാനത്തിന് മുമ്പ് ഞങ്ങൾ 'വന്ദേ മാതരം' ആലപിക്കുന്നുണ്ട് എന്ന് വ്യക്തമാക്കി. വന്ദേമാതരം, ദേശീയ ഗാനം എന്നിവയുമായി ബന്ധപ്പെട്ട കാര്യം മാത്രമെ നിലവിലെ നിർദ്ദേശത്തിൽ പരാമർശമുള്ളൂ എന്നും സംസ്ഥാന ഗാനത്തെക്കുറിച്ച് യാതൊരു നിർദ്ദേശങ്ങളുമില്ലെന്നും വിദ്യാഭ്യാസ വകുപ്പിലെ ഒരു ഉദ്യോഗസ്ഥൻ ചൂണ്ടിക്കാട്ടി.
ദേശീയ ഗീതത്തിന് 150 വർഷം തികയവെ കേന്ദ്ര ആഭ്യന്തര മന്ത്രാലയം ജനുവരിയിൽ പുറത്തിറക്കിയ നിർദ്ദേശത്തിന് പിന്നാലെയാണ് ഈ നീക്കം. "ബംഗ്ലാർ മാടി ബംഗ്ലാർ ജൽ" എന്ന സംസ്ഥാന ഗാനം അസംബ്ലികളിൽ ആലപിക്കാൻ പശ്ചിമ ബംഗാൾ സര്ക്കാര് നേരത്തെ ആവശ്യപ്പെട്ടിരുന്നു. ഈ സാഹചര്യത്തിൽ മൂന്ന് ഗാനങ്ങളും എങ്ങനെ ഉൾപ്പെടുത്തുമെന്നത് സംബന്ധിച്ച് ആശയക്കുഴപ്പങ്ങൾ ഉയർന്നിട്ടുണ്ട്.
ദേശീയ ഗാനം ഒരു കാരണവശാലും ഒഴിവാക്കാനാവില്ലെന്ന് ഒരു സ്കൂൾ അധികാരി പറഞ്ഞു. "ഇപ്പോൾ ഞങ്ങളുടെ ആദ്യ ഗാനം വന്ദേ മാതരം ആയിരിക്കും, സംസ്ഥാന ഗാനം കൂടി ഉൾപ്പെടുത്തുന്നത് കൂടുതൽ സമയമെടുക്കുകയും ക്ലാസുകൾ വൈകിപ്പിക്കുകയും ചെയ്യും. സംസ്ഥാന ഗാനത്തെക്കുറിച്ച് നോട്ടീസിൽ പരാമർശിച്ചിട്ടില്ലെങ്കിലും, മൂന്ന് ഗാനങ്ങൾക്കായി വിദ്യാർത്ഥികളെ നിർത്തുന്നത് എളുപ്പമുള്ള കാര്യമല്ല," അദ്ദേഹം കൂട്ടിച്ചേർത്തു.