శ్రీవారి నవరాత్రి బ్రహ్మోత్సవాలు.. పది నిమిషాల్లో 60 వేల టికెట్ల బుకింగ్‌
తిరుమల: శ్రీవారి నవరాత్రి బ్రహ్మోత్సవాల నేపథ్యంలో ఈ నెల 12, 13, 14, 18, 19, 20 తేదీలకు సంబంధించిన రూ.300 ప్రత్యేక ప్రవేశ దర్శనం టికెట్లకు భక్తుల నుంచి విశేష స్పందన వచ్చింది. బుధవారం ఉదయం 10 గంటలకు తితిదే ఆన్‌లైన్‌లో టికెట్లు విడుదల చేసింది. రోజుకు పదివేల చొప్పున మొత్తం 60 వేల టికెట్లు విడుదల చేయగా.. అవన్నీ కేవలం పది నిమిషాల్లో ఖాళీ అయ్యాయి. తితిదే వెబ్‌సైట్, యాప్‌లో ఆర్కిటెక్చర్‌ ఛేంజ్, అప్లికేషన్‌ అప్డేట్ చేయడంతో ఎలాంటి అవాంతరాలు లేకుండా భక్తులు టికెట్లు బుక్‌ చేసుకున్నారు. లక్షల మంది భక్తులు టికెట్ల కోసం యత్నించగా.. తితిదే ఐటీ విభాగం సమర్థంగా భక్తులకు ఇబ్బందులు లేకుండా టికెట్లు బుక్‌ చేసుకునే వెసులుబాటు కల్పించింది.
