కంగారూలదే తొలి విజయం
డర్బన్‌: సుమారు ఎనిమిదేండ్ల తర్వాత దక్షిణాఫ్రికాలో టెస్టు సిరీస్‌ ఆడుతున్న ఆస్ట్రేలియా తొలి మ్యాచ్‌లో భారీ విజయాన్ని సొంతం చేసుకుంది. మూడు మ్యాచ్‌ల సిరీస్‌లో భాగంగా మంగళవారం డర్బన్‌లో ముగిసిన తొలి టెస్టులో ఆ జట్టు.. 214 పరుగుల తేడాతో సౌతాఫ్రికాను ఓడించి సిరీస్‌లో 1-0 ఆధిక్యం సాధించింది. 421 పరుగుల ఛేదనలో ఆఖరిరోజు ఆరు వికెట్లు చేతిలో ఉండగా ఓవర్‌నైట్‌ స్కోరు 102/4తో ఆట ఆరంభించిన సఫారీ జట్టు.. 206 పరుగులకే ఆలౌట్‌ అయింది.
మార్‌క్రమ్‌ (75) ఒక్కడే పోరాడగా ఆఖర్లో మార్కో యాన్సె న్‌ (110 బంతుల్లో 29) కంగారూల విజయాన్ని కాస్త ఆలస్యం చేశాడు. ఆసీస్‌ పేసర్‌ జోష్‌ హేజిల్‌వుడ్‌ (6/49) కెరీర్‌ బెస్ట్‌ బౌలింగ్‌ ప్రదర్శనకు సఫారీలు తలవంచక తప్పలేదు. ఈనెల 18 నుంచి రెండో టెస్టు జరుగుతుంది.
