ബെംഗളൂരു മെട്രോ പിങ്ക് ലൈൻ എലിവേറ്റഡ് ഉദ്ഘാടനം വൈകില്ല? നവംബർ 15ന് മോദി എത്തുമെന്ന് സൂചന
ബെംഗളൂരു: യാത്രക്കാർ കാത്തിരിക്കുന്ന നമ്മ മെട്രോയുടെ പിങ്ക് ലൈൻ എലിവേറ്റഡ് ഭാഗം ഉദ്ഘാടനം ചെയ്യാൻ പ്രധാനമന്ത്രി നരേന്ദ്ര മോദി നവംബർ 15ന് ബെംഗളൂരു സന്ദർശിച്ചേക്കുമെന്ന് കർണാടക മുഖ്യമന്ത്രി ഡികെ ശിവകുമാർ. കലേന അഗ്രഹാരയ്ക്കും തവരെകെരെയ്ക്കും ഇടയിലുള്ള 7.5 കിലോമീറ്റർ എലിവേറ്റഡ് പാതയ്ക്ക് മെട്രോ റെയിൽ സുരക്ഷാ കമ്മീഷണറുടെ (സിഎംആർഎസ്) സുരക്ഷാ അനുമതി ലഭിച്ചുതോടെയാണ് ഇത്.
ഒക്ടോബർ 6 മുതൽ 8 വരെ ഈ ലൈൻ സിഎംആർഎസിന്റെ നിയമപരമായ സുരക്ഷാ പരിശോധനയ്ക്ക് വിധേയമായി. അടിസ്ഥാന സൗകര്യങ്ങൾ, സിഗ്നലിംഗ് സംവിധാനങ്ങൾ, റോളിംഗ് സ്‌റ്റോക്ക്, യാത്രക്കാരുടെ സുരക്ഷാ ക്രമീകരണങ്ങൾ എന്നിവയുടെ പരിശോധനകൾ, വേഗതാ പരീക്ഷണങ്ങൾ, വിലയിരുത്തലുകൾ എന്നിവയ്ക്ക് ശേഷം സിഎംആർഎസ് (സതേൺ സർക്കിൾ, ബെംഗളൂരു) വി വെങ്കിടസുബ്രഹ്മണ്യൻ അനുമതി നൽകി.
ക്ലിയറൻസിൽ വ്യക്തമാക്കിയിട്ടുള്ള വ്യവസ്ഥകൾക്കും ഓട്ടോമാറ്റിക് ട്രെയിൻ സംരക്ഷണ സംവിധാനം ഏർപ്പെടുത്തിയ പരിധികൾക്കും വിധേയമായി പരമാവധി 80 കിലോമീറ്റർ വേഗതയിൽ പാസഞ്ചർ സർവീസുകൾക്ക് അനുമതി നൽകുന്നു. പ്ലാറ്റ്‌ഫോമുകളിൽ അനുവദനീയമായ പരമാവധി വേഗത മണിക്കൂറിൽ 60 കിലോമീറ്ററായി നിജപ്പെടുത്തിയിരിക്കുന്നു.
വാണിജ്യ പ്രവർത്തനങ്ങൾക്ക് മുമ്പും സമയത്തും ബിഎംആർസിഎൽ പാലിക്കേണ്ട നിബന്ധനകളോടെയാണ് അനുമതി വരുന്നത്. സുരക്ഷയുമായി ബന്ധപ്പെട്ട ജോലികൾ പൂർത്തിയാക്കുക, പരിശീലനം ലഭിച്ച ആളുകളുടെ ലഭ്യത ഉറപ്പുവരുത്തുക, ട്രെയിൻ നിയന്ത്രണവും സിഗ്നലിംഗ് സംവിധാനങ്ങളും പരിശോധിക്കൽ, യാത്രക്കാരുടെ സൗകര്യങ്ങളും അടിയന്തര തയ്യാറെടുപ്പ് നടപടികളും നിലനിർത്തൽ എന്നിവ ഇതിൽ ഉൾപ്പെടുന്നു.
അഗ്നി സുരക്ഷ, സിസിടിവി നിരീക്ഷണം, പ്രവേശനക്ഷമത, സ്‌റ്റേഷൻ സൗകര്യങ്ങൾ, പ്രവർത്തന നടപടിക്രമങ്ങൾ എന്നിവയുമായി ബന്ധപ്പെട്ട ആവശ്യകതകളും കോർപ്പറേഷൻ പാലിക്കണം. കലേന അഗ്രഹാര, ഹുളിമാവ്, ഐഐഎംബി, ജെപി നഗർ നാലാം ഘട്ടം, ജയദേവ ഹോസ്‌പിറ്റൽ, റാഗിഗുഡ്ഡ, തവരെകെരെ എന്നിങ്ങനെ ഏഴ് സ്‌റ്റേഷനുകൾ ഉൾപ്പെടുന്നതാണ് എലവേറ്റഡ് സെക്ഷൻ.
നമ്മ മെട്രോയുടെ രണ്ടാം ഘട്ട ശൃംഖലയുടെ ഭാഗമാണ് പിങ്ക് ലൈൻ. എലവേറ്റഡ് സ്‌ട്രെച്ച് പ്രവർത്തനക്ഷമമായാൽ, ബെംഗളൂരു മെട്രോയുടെ പ്രവർത്തന ശൃംഖല 96.1 കിലോമീറ്ററിൽ നിന്ന് 103.6 കിലോമീറ്ററായി വികസിക്കും. ഒക്ടോബറിൽ എലിവേറ്റഡ് സെക്ഷൻ ഉദ്ഘാടനം ചെയ്യാൻ ക്ഷണിച്ചുകൊണ്ട് ശിവകുമാർ ഒക്ടോബർ 6ന് മോദിക്ക് കത്തയച്ചിരുന്നു.
പ്രധാനമന്ത്രിയുടെ സന്ദർശനത്തെക്കുറിച്ച് സർക്കാരിന് ഇതുവരെ ഔദ്യോഗിക സ്ഥിരീകരണം ലഭിച്ചിട്ടില്ലെന്ന് ബെംഗളൂരു വികസന മന്ത്രി കൃഷ്‌ണ ബൈരെ ഗൗഡ അറിയിച്ചു. ഞങ്ങൾക്ക് ഇതുവരെ ഔദ്യോഗിക വിവരങ്ങളൊന്നുമില്ല, പക്ഷേ നവംബർ പകുതിയോടെ തീയതി അന്തിമമായേക്കുമെന്ന് അനൗദ്യോഗിക സൂചനകളുണ്ട്. വ്യക്തത ലഭിക്കുന്നതിന് നവംബർ 3 അല്ലെങ്കിൽ 4 തീയതികളിൽ ഞാൻ കേന്ദ്രമന്ത്രി മനോഹർ ലാലുമായി അപ്പോയിന്മെന്റ് തേടിയിട്ടുണ്ട്, എന്നാൽ ഇത് ഇതുവരെ സ്ഥിരീകരിച്ചിട്ടില്ല; അദ്ദേഹം പറഞ്ഞു.
പിങ്ക് ലൈനിന്റെ ഭൂഗർഭ ഭാഗം വടക്കൻ ബെംഗളൂരുവിലെ നാഗവാര വരെ നീളുന്നു, പ്ലാറ്റ്‌ഫോം സ്‌ക്രീൻ വാതിലുകളും സിഗ്നലിംഗ് സംവിധാനങ്ങളും സ്ഥാപിക്കുന്നതും സംയോജിപ്പിക്കുന്നതും ഉൾപ്പെടെയുള്ള തുടർ ജോലികൾ നടന്നുകൊണ്ടിരിക്കുകയാണ്. നവംബറിൽ ഭൂഗർഭ സ്‌ട്രെച്ചിൽ ട്രയൽ റൺ നടത്താൻ പദ്ധതിയിട്ടിട്ടുണ്ടെന്നും ഈ വിഭാഗം 2027ൽ പ്രവർത്തനക്ഷമമാകുമെന്നും ബിഎംആർസിഎൽ സൂചിപ്പിച്ചു.
