ಫಾರ್ಮ್ 16 ಇನ್ನೂ ಮುಂದೆ ಫಾರ್ಮ್ 130 , ಫಾರ್ಮ್ 26 AS ಇನ್ನೂ ಫಾರ್ಮ್ 168 ಆಗಿ ಬದಲಾವಣೆ! - ಹೊಸ ಕಾಯಿದೆ ಜಾರಿ ಎಫೆಕ್ಟ್

ಏಪ್ರಿಲ್ 1, 2026ರಿಂದ ದೇಶದಲ್ಲಿ ಹೊಸ ಆದಾಯ ತೆರಿಗೆ ಕಾಯಿದೆ 2026 ಜಾರಿಗೆ ಬರಲಿದೆ. ಈ ಹೊಸ ಕಾಯಿದೆಯಡಿ ಟಿಡಿಎಸ್ ವಿವರಗಳನ್ನು ಒಳಗೊಂಡಿರುವ ಫಾರ್ಮ್ 16 ಅನ್ನು ಫಾರ್ಮ್ 130 ಎಂದು ಮರುಸಂಖ್ಯೆಗೊಳಿಸಲಾಗಿದೆ. ಅದೇ ರೀತಿ ಫಾರ್ಮ್ 26AS ಅನ್ನು ಫಾರ್ಮ್ 168 ಎಂದು ಬದಲಾಯಿಸಲಾಗಿದೆ. ಆದರೆ ಈ ಫಾರ್ಮ್‌ಗಳ ವಿಷಯವಸ್ತು, ಮಾಹಿತಿಯ ಸ್ವರೂಪ ಅಥವಾ ಸಲ್ಲಿಕೆ ಸಮಯದಲ್ಲಿ ಯಾವುದೇ ಬದಲಾವಣೆ ಮಾಡಲಾಗಿಲ್ಲ. 

 ಆದಾಯ ತೆರಿಗೆ ಇಲಾಖೆ ಕರಡು ಆದಾಯ ತೆರಿಗೆ ನಿಯಮಗಳು, 2026 ಅನ್ನು ಬಿಡುಗಡೆ ಮಾಡಿದ್ದು, ಇದು ಹೊಸ ಕಾಯಿದೆಯಡಿ ಅನುಸರಣೆ ಚೌಕಟ್ಟನ್ನು ರೂಪಿಸುತ್ತದೆ. ಈ ಕರಡು ನಿಯಮಗಳು ಪಾಲುದಾರರ ಸಮಾಲೋಚನೆಗೆ ತೆರೆದಿದ್ದು, ಆದಾಯ ತೆರಿಗೆ ಫಾರ್ಮ್‌ಗಳ ಸಮಗ್ರ ಮರುಸಂಖ್ಯೆಯನ್ನು ಪರಿಚಯಿಸುತ್ತವೆ. ತಜ್ಞರ ಪ್ರಕಾರ, ಈ ಸಂಖ್ಯಾ ಬದಲಾವಣೆ ಕೇವಲ ಆಡಳಿತಾತ್ಮಕ ಮತ್ತು ರಚನಾತ್ಮಕ ಕ್ರಮವಾಗಿದ್ದು, ತೆರಿಗೆ ನೀತಿಯಲ್ಲಿ ಅಥವಾ ಅನುಸರಣೆ ಹೊರೆಗಳಲ್ಲಿ ಯಾವುದೇ ಮಹತ್ವದ ಬದಲಾವಣೆ ತರದು. 

 ಇದಲ್ಲದೆ, 2025ರ ಕಾಯಿದೆಯಡಿ “ಹಿಂದಿನ ವರ್ಷ” ಮತ್ತು “ಮೌಲ್ಯಮಾಪನ ವರ್ಷ” ಎಂಬ ವಿಭಿನ್ನ ಪರಿಕಲ್ಪನೆಗಳನ್ನು ತೆಗೆದುಹಾಕಿ, ಎರಡನ್ನೂ “ತೆರಿಗೆ ವರ್ಷ” ಎಂಬ ಒಂದೇ ಪದದಡಿ ಏಕೀಕರಿಸಲಾಗಿದೆ. ಹೀಗಾಗಿ 2026–27ರ ತೆರಿಗೆ ವರ್ಷದ ಆದಾಯಕ್ಕೆ ಸಂಬಂಧಿಸಿದ ಫಾರ್ಮ್‌ಗಳಲ್ಲಿ “ತೆರಿಗೆ ವರ್ಷ 2026–27” ಎಂದು ಉಲ್ಲೇಖಿಸಲಾಗುತ್ತದೆ. ಇದರಿಂದ ದಾಖಲೆಗಳ ಉಲ್ಲೇಖ ಸರಳವಾಗುತ್ತಿದ್ದು, ಅರ್ಥದ ಗೊಂದಲ ಕಡಿಮೆಯಾಗಲಿದೆ.