Guwahati: ಅಸ್ಸಾಂ ವಿಧಾನಸಭಾ ಚುನಾವಣೆ; ಮೊದಲ ಬಾರಿಗೆ ಕಣಕ್ಕಿಳಿದ ಸಂಸದ ಗೌರವ್ ಗೊಗೊಯ್!

ಮುಂಬರುವ 2026ರ ಅಸ್ಸಾಂ ವಿಧಾನಸಭಾ ಚುನಾವಣೆಗೆ ಕಾಂಗ್ರೆಸ್ ಪಕ್ಷವು ತನ್ನ 42 ಅಭ್ಯರ್ಥಿಗಳ ಮೊದಲ ಪಟ್ಟಿಯನ್ನು ಬಿಡುಗಡೆ ಮಾಡಿದೆ. ಈ ಪಟ್ಟಿಯಲ್ಲಿ ಲೋಕಸಭೆಯ ಕಾಂಗ್ರೆಸ್ ಉಪನಾಯಕ ಹಾಗೂ ಹಾಲಿ ಸಂಸದ ಗೌರವ್ ಗೊಗೊಯ್ ಅವರ ಹೆಸರು ಪ್ರಮುಖ ಆಕರ್ಷಣೆಯಾಗಿದ್ದು, ಅವರು ಮೊದಲ ಬಾರಿಗೆ ವಿಧಾನಸಭಾ ಚುನಾವಣಾ ಕಣಕ್ಕೆ ಇಳಿಯುತ್ತಿದ್ದಾರೆ. ಗೌರವ್ ಗೊಗೊಯ್ ಅವರು ತಮ್ಮ ಲೋಕಸಭಾ ಕ್ಷೇತ್ರವಾದ ಜೋರ್ಹತ್ ವಿಧಾನಸಭಾ ಕ್ಷೇತ್ರದಿಂದಲೇ ಸ್ಪರ್ಧಿಸಲಿದ್ದಾರೆ. ಈ ಬಗ್ಗೆ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಂಡಿರುವ ಅವರು, "ಅವಕಾಶ ನೀಡಿದ ಎಐಸಿಸಿ ಅಧ್ಯಕ್ಷ ಮಲ್ಲಿಕಾರ್ಜುನ ಖರ್ಗೆ, ರಾಹುಲ್ ಗಾಂಧಿ ಮತ್ತು ಪ್ರಿಯಾಂಕಾ ಗಾಂಧಿ ಅವರಿಗೆ ಕೃತಜ್ಞತೆಗಳು" ಎಂದು ತಿಳಿಸಿದ್ದಾರೆ. ಈ ಬಾರಿಯ ಪಟ್ಟಿಯಲ್ಲಿ ಮಾಜಿ ಮುಖ್ಯಮಂತ್ರಿಗಳ ಪುತ್ರರಿಗೆ ಹೆಚ್ಚಿನ ಆದ್ಯತೆ ನೀಡಲಾಗಿದೆ. 

ಗೌರವ್ ಗೊಗೊಯ್: ಮಾಜಿ ಸಿಎಂ ತರುಣ್ ಗೊಗೊಯ್ ಅವರ ಪುತ್ರ.(ಜೋರ್ಹತ್ ಕ್ಷೇತ್ರದಿಂದ ಸ್ಪರ್ಧೆ) -ದೇವಬ್ರತ ಸೈಕಿಯಾ: ಮಾಜಿ ಸಿಎಂ ಹಿತೇಶ್ವರ್ ಸೈಕಿಯಾ ಅವರ ಪುತ್ರ (ನಜಿರಾ ಕ್ಷೇತ್ರದಿಂದ ಸ್ಪರ್ಧೆ). -ದಿಗಂತ ಬರ್ಮನ್: ಮಾಜಿ ಸಿಎಂ ಭೂಮಿಧರ್ ಬರ್ಮನ್ ಅವರ ಪುತ್ರ (ಬರ್ಖೇತ್ರಿ ಕ್ಷೇತ್ರ). -ತನ್ಜಿಲ್ ಹುಸೇನ್: ಸಂಸದ ರಕೀಬುಲ್ ಹುಸೇನ್ ಅವರ ಪುತ್ರ (ಸಮಗುರಿ ಕ್ಷೇತ್ರ). ಪಟ್ಟಿಯಲ್ಲಿರುವ ಇತರ ಪ್ರಮುಖರು: ಪ್ರತೀಕ್ ಬೋರ್ಡೋಲೋಯ್(ಮಾರ್ಗರಿಟಾ ಕ್ಷೇತ್ರ).ಪ್ರಾಂಜಲ್ ಘಟೋವರ್ (ಚಬುವಾ-ಲಹೋವಾಲ್ ಕ್ಷೇತ್ರ). ಮಹಿಳಾ ಅಭ್ಯರ್ಥಿಗಳು: ನಂದಿತಾ ದಾಸ್ (ಹಾಜೋ-ಸುವಾಲ್ಕುಚಿ) ಮತ್ತು ಮೀರಾ ಬೋರ್ಠಾಕೂರ್ ಗೋಸ್ವಾಮಿ (ದಿಸ್ಪುರ್) ಅವರಿಗೆ ಟಿಕೆಟ್ ನೀಡಲಾಗಿದೆ.