ಬೀದಿಯಲ್ಲಿ ಮೂತ್ರ ವಿಸರ್ಜಿಸಿದರೆ ಇನ್ನು 10 ಪಟ್ಟು ಅಧಿಕ ದಂಡ, ಜನ್ ವಿಶ್ವಾಸ್ ಕಾಯಿದೆಗೆ ಕೇಂದ್ರದ ಗ್ರೀನ್ ಸಿಗ್ನಲ್
ಜನ ವಿಶ್ವಾಸ (ತಿದ್ದುಪಡಿ) ಮಸೂದೆ 2026ರ ಅಡಿಯಲ್ಲಿ, ಸಾರ್ವಜನಿಕ ಸ್ಥಳಗಳಲ್ಲಿ ಮಲಮೂತ್ರ ವಿಸರ್ಜನೆ, ಕಸ ಎಸೆಯುವುದು ಮತ್ತು ಲೈಸೆನ್ಸ್ ಇಲ್ಲದ ವ್ಯಾಪಾರಗಳಿಗೆ ವಿಧಿಸುವ ದಂಡವನ್ನು ಗಣನೀಯವಾಗಿ ಹೆಚ್ಚಿಸಲಾಗಿದೆ. ಕೆಲವು ಸಣ್ಣ ಅಪರಾಧಗಳನ್ನು ಶಿಕ್ಷೆಯಿಂದ ಮುಕ್ತಗೊಳಿಸಿ ದಂಡಕ್ಕೆ ಸೀಮಿತಗೊಳಿಸಲಾಗಿದೆ. 'ಜನ ವಿಶ್ವಾಸ (ನಿಬಂಧನೆಗಳ ತಿದ್ದುಪಡಿ) ಬಿಲ್ 2026' ಸಂಸತ್ತಿನಲ್ಲಿ ಅಂಗೀಕಾರವಾದರೆ, ಸಾರ್ವಜನಿಕ ಸ್ಥಳಗಳಲ್ಲಿ ಮಲಮೂತ್ರ ವಿಸರ್ಜನೆ ಮಾಡುವವರಿಗೆ ವಿಧಿಸುವ ದಂಡದ ಮೊತ್ತವು 10 ಪಟ್ಟು ಹೆಚ್ಚಾಗಲಿದೆ. ಸದ್ಯ ದೆಹಲಿ ಮುನ್ಸಿಪಲ್ ಕಾರ್ಪೊರೇಷನ್ ಆಕ್ಟ್, 1957ರ ಅಡಿಯಲ್ಲಿ 50 ರೂ. ಇರುವ ದಂಡವನ್ನು 500 ರೂ.ಗೆ ಏರಿಸಲು ಪ್ರಸ್ತಾಪಿಸಲಾಗಿದೆ. ಇದರೊಂದಿಗೆ ಬೀದಿಗಳಲ್ಲಿ ಕೊಳಕು ತ್ಯಾಜ್ಯ ಎಸೆಯುವವರಿಗೂ ಭಾರೀ ದಂಡ ಬೀಳಲಿದೆ. ಲೈಸೆನ್ಸ್ ಇಲ್ಲದೆ ಅಥವಾ ಲೈಸೆನ್ಸ್ ನಿಯಮಗಳನ್ನು ಉಲ್ಲಂಘಿಸಿ ವಸತಿ ಗೃಹಗಳು (Lodging), ಹೋಟೆಲ್ಗಳು ಮತ್ತು ಟೀ ಶಾಪ್ಗಳನ್ನು ನಡೆಸುವವರಿಗೆ ನೀಡಲಾಗುತ್ತಿದ್ದ ಶಿಕ್ಷೆಯನ್ನು ಕಠಿಣಗೊಳಿಸಲಾಗಿದೆ. ಸದ್ಯ ಇಂತಹ ಉಲ್ಲಂಘನೆಗಳಿಗೆ ಕೇವಲ 100 ರೂ. ದಂಡವಿದ್ದು, ಅದನ್ನು 1,000 ರೂ.ಗೆ ಏರಿಸಲು ಸೆಕ್ಷನ್ 421ರ ಅಡಿಯಲ್ಲಿ ತಿದ್ದುಪಡಿ ತರಲಾಗಿದೆ.