ದಿಢೀರನೇ ಮೊಬೈಲ್ ರಿಂಗ್ ಆಗ್ತಿದೆ ಅಂದ್ರೆ ಭಯಪಡಬೇಡಿ.. ಇದು ಸರ್ಕಾರವೇ ಮಾಡ್ತಿರುವ ಟೆಸ್ಟಿಂಗ್!
ನವದೆಹಲಿ/ಬೆಂಗಳೂರು (ಮೇ.2): ನಿಮ್ಮ ಮೊಬೈಲ್ ಫೋನ್ ಇಂದು ದಿಢೀರನೆ ವಿಚಿತ್ರವಾದ ಶಬ್ದದೊಂದಿಗೆ ರಿಂಗ್ ಆಗಿದೆಯೇ? ಸ್ಕ್ರೀನ್ ಮೇಲೆ 'Extremely Severe Alert' ಎಂಬ ಸಂದೇಶ ಕಾಣಿಸಿಕೊಂಡು ಗಾಬರಿ ಹುಟ್ಟಿಸಿದೆಯೇ? ಆದ್ರೆ, ಈ ವಿಚಾರವಾಗಿ ನೀವು ಭಯಪಡುವ ಅಗತ್ಯವಿಲ್ಲ. ಇದು ಭಾರತ ಸರ್ಕಾರವು ಜಾರಿಗೆ ತರುತ್ತಿರುವ ಹೊಸ ಸುರಕ್ಷಾ ತಂತ್ರಜ್ಞಾನದ ಪರೀಕ್ಷಾರ್ಥ ಪ್ರಯೋಗವಾಗಿದೆ.
ಭಾರತ ಸರ್ಕಾರವು ವಿಪತ್ತು ನಿರ್ವಹಣಾ ಪ್ರಾಧಿಕಾರದೊಂದಿಗೆ ಸೇರಿ ದೇಶೀಯ ತಂತ್ರಜ್ಞಾನವನ್ನು ಬಳಸಿಕೊಂಡು 'ಸೆಲ್ ಬ್ರಾಡ್ಕಾಸ್ಟ್' (Cell Broadcast) ಎಂಬ ಹೊಸ ವ್ಯವಸ್ಥೆಯನ್ನು ರೂಪಿಸಿದೆ. ಪ್ರಕೃತಿ ವಿಕೋಪಗಳು (ಪ್ರವಾಹ, ಸುನಾಮಿ, ಭೂಕಂಪ) ಅಥವಾ ತುರ್ತು ಪರಿಸ್ಥಿತಿಗಳು ಎದುರಾದಾಗ ನಾಗರಿಕರಿಗೆ ತಕ್ಷಣವೇ ಎಚ್ಚರಿಕೆ ನೀಡಲು ಈ ತಂತ್ರಜ್ಞಾನವನ್ನು ಬಳಸಲಾಗುತ್ತದೆ. ಅದರ ಭಾಗವಾಗಿಯೇ ಇಂದು ಅನೇಕ ಮೊಬೈಲ್ಗಳಿಗೆ ಈ ಪರೀಕ್ಷಾರ್ಥ ಸಂದೇಶವನ್ನು ಕಳುಹಿಸಲಾಗಿದೆ.
ಭಾರತ ಸರ್ಕಾರವು ತನ್ನ ನಾಗರಿಕರಿಗೆ ತ್ವರಿತ ವಿಪತ್ತು ಮುನ್ನೆಚ್ಚರಿಕೆ ಸೇವೆಯನ್ನು ಒದಗಿಸಲು ದೇಶೀಯ ತಂತ್ರಜ್ಞಾನವನ್ನು ಬಳಸಿಕೊಂಡು ಸೆಲ್ ಬ್ರಾಡ್ಕಾಸ್ಟ್ ವ್ಯವಸ್ಥೆಯನ್ನು ಪ್ರಾರಂಭಿಸುತ್ತಿದೆ. ಸುರಕ್ಷಿತ ರಾಷ್ಟ್ರ;. ಈ ಸಂದೇಶವು ಬಂದಾಗ ಸಾರ್ವಜನಿಕರು ಯಾವುದೇ ಕ್ರಮ ಕೈಗೊಳ್ಳುವ ಅಗತ್ಯವಿರುವುದಿಲ್ಲ. ಇದು ಕೇವಲ ಪ್ರಾಯೋಗಿಕ ಪರೀಕ್ಷಾರ್ಥ ಸಂದೇಶವಾಗಿದೆ. -ಭಾರತ ಸರ್ಕಾರ.