റെയില്വെ അടിമുടി മാറി; 20 മണിക്കൂര് വേണ്ടിടത്ത് ഇനി വെറും 6 മണിക്കൂര്, ഡല്ഹി-സിലിഗുരി യാത്ര
ന്യൂഡല്ഹി: ഇന്ത്യന് റെയില്വെ അതിവേഗമാണ് മാറുന്നത്. പുതിയ ട്രെയിനുകള്, ലൈനുകളുടെ വൈദ്യുതീകരണം, പുതിയ പാതകള് എന്നിവയെല്ലാം നടപ്പാക്കുകയാണ്. വന്ദേഭാരത് കൂടുതല് റൂട്ടുകളില് സര്വീസ് തുടങ്ങി. ഇനി മറ്റൊരു ചുവട് വെക്കുകയാണ് റെയില്വെ. ബുള്ളറ്റ് ട്രെയിന് പദ്ധതി അടുത്ത വര്ഷം മുതല് സജീവമാകുമെന്നാണ് വിവരം. രണ്ടാമത്തെ ബുള്ളറ്റ് ട്രെയിന് പാത സംബന്ധിച്ച പ്രഖ്യാപനം വന്നു കഴിഞ്ഞു.
മഹാരാഷ്ട്രയിലെ മുംബൈക്കും ഗുജറാത്തിലെ അഹമ്മദാബാദിനും ഇടയിലാണ് ഇന്ത്യയിലെ ആദ്യ ബുള്ളറ്റ് ട്രെയിന് പാത വരുന്നത്. 508 കിലോമീറ്ററുള്ള പാതയുടെ നിര്മാണം അതിവേഗം പുരോഗമിക്കുകയാണ്. ഇതിനിടെയാണ് റെയില്വെ മന്ത്രി അശ്വനി വൈഷ്ണവ് രണ്ടാമത്തെ ബുള്ളറ്റ് ട്രെയിന് റൂട്ട് പ്രഖ്യാപിച്ചിരിക്കുന്നത്. ന്യൂഡല്ഹിയില് നിന്ന് പശ്ചിമ ബംഗാളിലെ സിലിഗുരിയിലേക്കാണ് ഈ പാത.
നിലവില് ന്യൂഡല്ഹിയില് നിന്ന് സിലിഗുരിയിലേക്ക് ട്രെയിന് മാര്ഗം പോകുമ്പോള് 20 മണിക്കൂര് വേണ്ടി വരുന്നുണ്ട്. ബുള്ളറ്റ് ട്രെയിന് വന്നാല് വെറും 6 മണിക്കൂറില് ലക്ഷ്യത്തിലെത്താന് സാധിക്കും. ഉത്തര് പ്രദേശിലെ ലഖ്നൗ, വരാണസി, ബിഹാറിലെ പട്ന തുടങ്ങിയ പ്രധാന നഗരങ്ങള് പിന്നിട്ടാകും ട്രെയിന് സിലഗുരിയില് എത്തുക എന്ന് അശ്വനി വൈഷ്ണവ് പറയുന്നു.
സിലിഗുരി എന്ന പ്രദേശത്തിന്റെ പ്രത്യേകത അറിയാം
പശ്ചിമ ബംഗാളിലെ ഡാര്ജിലിംഗ് ജില്ലയില്, ഹിമാലയന് താഴ്വരയുടെ മടിത്തട്ടില് മഹാനന്ദ നദിക്കരയില് സ്ഥിതി ചെയ്യുന്ന പ്രധാന നഗരമാണ് സിലിഗുരി. വടക്കുകിഴക്കന് ഇന്ത്യയിലേക്കുള്ള പ്രവേശന കവാടമായി അറിയപ്പെടുന്ന ഈ പ്രദേശം, യാത്രക്കാര്ക്ക് തങ്ങളുടെ വിനോദസഞ്ചാര പര്യടനങ്ങള് ആസൂത്രണം ചെയ്യാന് പറ്റിയ മികച്ച താവളമാണ്. ചരിത്രപരമായും വാണിജ്യപരമായും ഏറെ പ്രാധാന്യമുള്ള ഒരു നഗരം കൂടിയാണിത്.
ഗതാഗത സൗകര്യങ്ങളുടെ കാര്യത്തില് സിലിഗുരി ഏറെ മുന്നിലാണ്. ബാഗ്ഡോഗ്ര വിമാനത്താവളമാണ് നഗരത്തോട് ഏറ്റവും അടുത്തുനില്ക്കുന്നത്. റെയില്വേ മാര്ഗമാണെങ്കില്, ഇന്ത്യന് റെയില്വേയുടെ നിര്ണായക കണ്ണിയായ ന്യൂ ജല്പൈഗുരി സ്റ്റേഷന് ഇവിടെയുണ്ട്. മികച്ച റോഡ് ശൃംഖലകളും നഗരത്തെ രാജ്യത്തിന്റെ മറ്റ് ഭാഗങ്ങളുമായി സുഗമമായി ബന്ധിപ്പിക്കുന്നു. 'ചിക്കന്സ് നെക്ക്' എന്നറിയപ്പെടുന്ന സിലിഗുരി ഭൂമിശാസ്ത്രപരമായി ഏറെ തന്ത്രപ്രധാനമാണ്. വടക്കുകിഴക്കന് ഇന്ത്യയെ രാജ്യത്തിന്റെ പ്രധാന ഭാഗവുമായി ബന്ധിപ്പിക്കുന്ന ഇടുങ്ങിയ ഇടനാഴിയാണിത്. കോഴിയുടെ കഴുത്തിന് സമാനമായ ആകൃതിയിലുള്ള ഈ ഭൂപ്രദേശത്തിന്റെ വിന്യാസം തന്നെയാണ് ഇതിന് ആ പേര് ലഭിക്കാന് കാരണമായത്.
ഡാര്ജിലിംഗ്, കലിംപോങ്, ദൂരാസ് എന്നീ മനോഹര സ്ഥലങ്ങളും സിക്കിം തലസ്ഥാനമായ ഗാംങ്ടോക്കും സിലിഗുരിക്ക് തൊട്ടടുത്തുതന്നെയാണ് സ്ഥിതി ചെയ്യുന്നത്. അതിനാല് തന്നെ, വിനോദസഞ്ചാരികള്ക്ക് ഇവിടെ നിന്നും ഈ സ്ഥലങ്ങളിലേക്ക് അതിവേഗം യാത്ര ചെയ്യാം. സിലിഗുരിയില് തന്നെ കാഴ്ചകള് പലതുണ്ട്. മഹാനന്ദ വന്യജീവി സങ്കേതം, സയന്സ് സിറ്റി, വിശാലമായ തേയിലത്തോട്ടങ്ങള് എന്നിവ സഞ്ചാരികളെ ആകര്ഷിക്കുന്നു. കൂടാതെ ചരിത്രമുറങ്ങുന്ന കോറോണേഷന് പാലവും ഇസ്കോണ് ക്ഷേത്രവും സന്ദര്ശിക്കേണ്ടുന്ന പ്രധാന സ്ഥലങ്ങളാണ്.