പ്രളയം തകർത്തത് പാമ്പ് വളർത്തൽ കേന്ദ്രങ്ങളും മൃഗശാലകളും; നാട്ടിലറങ്ങി വിഷപ്പാമ്പുകളും വന്യമൃഗങ്ങളും, മുൾമുനയിൽ ചൈനയിലെ ജനങ്ങൾ
തെക്കൻ ചൈനയിൽ കടുത്ത നാശം വിതച്ച് മെയ്സാക് ചുഴലിക്കാറ്റും തുടർന്നുണ്ടായ പ്രളയവും. പ്രളയക്കെടുതിയിൽ മരിച്ചവരുടെ എണ്ണം 39 ആയി. ഗുവാങ്ഷി ഷുവാങ് സ്വയംഭരണ പ്രദേശത്ത് ഡാം തകർന്നതാണ് മരണസംഖ്യ കുത്തനെ ഉയരാൻ കാരണമായത്. എന്നാൽ പ്രളയത്തോടൊപ്പം പ്രദേശവാസികളെ കടുത്ത ഭീതിയിലാഴ്ത്തിക്കൊണ്ട് മറ്റൊരു ദുരന്തം കൂടി സംഭവിച്ചിരിക്കുന്നു. വെള്ളപ്പൊക്കത്തിൽ പാമ്പ് വളർത്തൽ കേന്ദ്രങ്ങളും മൃഗശാലകളും തകർന്നതോടെ നൂറുകണക്കിന് വിഷപ്പാമ്പുകളും വന്യമൃഗങ്ങളും ഇപ്പോൾ ജനവാസമേഖലകളിൽ സ്വൈര്യവിഹാരം നടത്തുകയാണ്.
അതിഭീകരമായ പ്രകൃതിദുരന്തത്തിനൊപ്പം വിഷപ്പാമ്പുകളുടെയും വന്യമൃഗങ്ങളുടെയും സാന്നിധ്യം കൂടിയായതോടെ തെക്കൻ ചൈനയിലെ ജനജീവിതം പൂർണമായും സ്തംഭിച്ച അവസ്ഥയിലാണ്. ലക്ഷക്കണക്കിന് ആളുകളാണ് വീടുകളിൽ കുടുങ്ങിക്കിടക്കുന്നത്.
∙ ഡാം തകർന്നു: നാനിങ്ങിൽ മാത്രം 26 മരണം കഴിഞ്ഞ കുറച്ചു ദിവസങ്ങളായി ചൈനയുടെ തെക്കൻ പ്രവിശ്യകളിൽ കനത്ത മഴയാണ് പെയ്യുന്നത്. വ്യാഴാഴ്ച ഗുവാങ്ഷി അധികൃതർ പുറത്തുവിട്ട കണക്കുകൾ പ്രകാരം പ്രളയത്തിൽ മരിച്ചവരുടെ എണ്ണം 39 ആയി. ഇതിൽ ഭൂരിഭാഗം മരണങ്ങളും റിപ്പോർട്ട് ചെയ്തിരിക്കുന്നത് നാനിങ് നഗരത്തിലാണ്. ഇവിടെയുണ്ടായ ഒരു വലിയ റിസർവോയർ ഡാമിന്റെ തകർച്ചയാണ് ദുരന്തത്തിന്റെ വ്യാപ്തി വർധിപ്പിച്ചത്. ഡാം തകർന്ന് കുത്തിയൊലിച്ച് വന്ന വെള്ളപ്പാച്ചിലിൽ പെട്ട് 26 പേർക്കാണ് ഒരൊറ്റ ദിവസം കൊണ്ട് ജീവൻ നഷ്ടമായത്.
കേന്ദ്ര-തെക്കൻ മേഖലകളിൽ നിന്നായി ഇതുവരെ 1.3 ലക്ഷത്തിലധികം (130,000) താമസക്കാരെ സുരക്ഷിത സ്ഥാനങ്ങളിലേക്ക് മാറ്റിപ്പാർപ്പിച്ചിട്ടുണ്ട്. പ്രളയബാധിത പ്രദേശങ്ങളിലെ റോഡുകളും പാലങ്ങളും ആശയവിനിമയ സംവിധാനങ്ങളും പൂർണമായും തകർന്നു.
∙ ഗ്രാമങ്ങളെ ഭീതിയിലാഴ്ത്തി 900 പാമ്പുകൾ! കൂട്ടത്തിൽ രാജവെമ്പാലകളും പ്രളയജലത്തിന്റെ ഉയർച്ചയേക്കാൾ പ്രദേശവാസികളെ ഇപ്പോൾ ഭയപ്പെടുത്തുന്നത് വെള്ളത്തിലൂടെ നീന്തിനടക്കുന്ന പാമ്പുകളാണ്. ഹെങ്ഷു നഗരത്തിലെ ഒരു വാണിജ്യ പാമ്പ് വളർത്തൽ കേന്ദ്രം തിങ്കളാഴ്ച രാവിലെ പൂർണമായി വെള്ളത്തിനടിയിലായിരുന്നു. സമീപത്തെ അണക്കെട്ടിന്റെ സംരക്ഷണ ഭിത്തികൾ തകർന്നതാണ് ഈ ഫാം മുങ്ങാൻ കാരണമായത്. ഫാം തകർന്നതോടെ ഇവിടെയുണ്ടായിരുന്ന ഏകദേശം 800 മുതൽ 900 വരെ പാമ്പുകളാണ് പ്രളയജലത്തിലേക്കെത്തിയത്.
∙ ഭീതിപ്പെടുത്തുന്ന ദൃശ്യങ്ങൾ ചൈനീസ് സോഷ്യൽ മീഡിയ പ്ലാറ്റ്ഫോമുകളിൽ പ്രചരിക്കുന്ന ദൃശ്യങ്ങൾ കടുത്ത ഭീതി ഉളവാക്കുന്നതാണ്. ചെളി നിറഞ്ഞ പ്രളയജലത്തിലൂടെ പാമ്പുകൾ കൂട്ടത്തോടെ നീന്തുന്നതും, വെള്ളത്തിലൂടെ ഒഴുകിപ്പോകുന്ന മാലിന്യങ്ങളിലും കട്ടിലുകളിലും മറ്റും പാമ്പുകൾ കയറിയിരിക്കുന്നതും ദൃശ്യങ്ങളിൽ കാണാം. വെള്ളപ്പൊക്കത്തിൽ പകുതി മുങ്ങിയ വീടുകളുടെ മുകളിലത്തെ നിലകളിലേക്കും ജനലുകളിലൂടെയും മറ്റും ഈ പാമ്പുകൾ ഇഴഞ്ഞുകയറുന്നുണ്ട്. ലോക്കൽ ഡെങ്വെയ് വില്ലേജ് കമ്മിറ്റി തലവൻ വു ഷി 'സൗത്ത് ചൈന മോണിങ് പോസ്റ്റിനോട്' പ്രതികരിച്ചതനുസരിച്ച്, രക്ഷപ്പെട്ട പാമ്പുകളിൽ പലതും വിഷമില്ലാത്ത ജലപ്പാമ്പുകളും കിംഗ് റാറ്റ് സ്നേക്കുകളും ആണെങ്കിലും, ഗണ്യമായ ഒരു വിഭാഗം അതിമാരകമായ വിഷമുള്ള മൂർഖൻ പാമ്പുകളാണ്. ഇതിനകം തന്നെ പ്രളയത്തിൽ ഒറ്റപ്പെട്ടുപോയ ഒരു ഗ്രാമീണന് പാമ്പ് കടിയേറ്റിട്ടുണ്ട്. ഇയാളെ അടിയന്തര ചികിത്സയ്ക്കായി ആശുപത്രിയിൽ പ്രവേശിപ്പിച്ചു.
പാമ്പുകളെ പിടികൂടാൻ പ്രാദേശികമായി പാമ്പുപിടുത്തത്തിൽ പരിചയമുള്ള ഒരു ഡസനോളം സന്നധപ്രവർത്തകർ രംഗത്തിറങ്ങിയിട്ടുണ്ട്. മുട്ടൊപ്പം വെള്ളത്തിൽ മീൻവലകളും സുരക്ഷാ ഗിയറുകളുമായി ഇവർ പാമ്പുകളെ തിരയുകയാണ്. ∙ സീബ്രകൾ തെരുവിൽ പാമ്പുകളുടെ ഭീഷണിക്ക് പുറമേ, സമീപ നഗരമായ ഗുയിഗാങ്ങിൽ വന്യമൃഗങ്ങളും ജനവാസമേഖലയിലേക്ക് ഇറങ്ങിയിട്ടുണ്ട്. ഇവിടുത്തെ പ്രാദേശിക മൃഗശാലയ്ക്ക് കനത്ത നാശനഷ്ടം സംഭവിച്ചതോടെ നൂറിലധികം മൃഗങ്ങളാണ് പ്രളയവെള്ളത്തിലേക്ക് ചാടി രക്ഷപ്പെട്ടത്. മൃഗശാലാ അധികൃതർ ബുധനാഴ്ച ഒരു അടിയന്തര പൊതു അഭ്യർഥന പുറപ്പെടുവിച്ചിട്ടുണ്ട്. കാണാതായ മൃഗങ്ങളെ കണ്ടെത്താൻ സഹായിക്കണമെന്നാണ് അഭ്യർഥന. അൽപാക്കകൾ (Alpacas), മിനിയേച്ചർ പന്നികൾ, സീബ്രകൾ, നാല് മുള്ളൻപന്നികൾ, 30 മയിലുകൾ എന്നിവയുൾപ്പെടെയുള്ള വൈവിധ്യമാർന്ന മൃഗങ്ങളാണ് ഇപ്പോൾ നഗരത്തിന്റെ വിവിധ ഭാഗങ്ങളിൽ അലഞ്ഞുതിരിയുന്നത്.
∙ രക്ഷാപ്രവർത്തനം ഊർജിതം; ചൈനീസ് സർക്കാരിന്റെ മുന്നറിയിപ്പ് പ്രകൃതിദുരന്തവും മൃഗങ്ങളുടെ ഭീഷണിയും ഒരുമിച്ചെത്തിയ ഈ ഇരട്ട പ്രതിസന്ധിയെ നേരിടാൻ ബെയ്ജിങ്ങിലെ കേന്ദ്ര സർക്കാർ അടിയന്തര നടപടികൾ സ്വീകരിച്ചിട്ടുണ്ട്. 36,000-ത്തിലധികം ദുരന്തനിവാരണ സാമഗ്രികളാണ് പ്രദേശത്തേക്ക് അയച്ചിരിക്കുന്നത്. കൂടാതെ അടിയന്തര രക്ഷാപ്രവർത്തകർ ലൗഡ് സ്പീക്കറുകളിലൂടെയും വീചാറ്റ് ബ്രോഡ്കാസ്റ്റ് ഗ്രൂപ്പുകളിലൂടെയും ജനങ്ങൾക്ക് കർശന നിർദേശങ്ങൾ നൽകുന്നുണ്ട്.