తెలంగాణ వ్యాప్తంగా అన్ని దేవాలయాల్లో వరుణ యాగాలు: మంత్రి కొండా సురేఖ
తెలంగాణ రాష్ట్రంలో వర్షాలు లేక రైతాంగం తీవ్ర ఇబ్బందులు పడుతున్న నేపథ్యంలో త్వరలోనే హైదరాబాద్లో అధికారికంగా ‘వరుణ యాగం’ జరిపిస్తామని రాష్ట్ర దేవాదాయ శాఖ మంత్రి కొండా సురేఖ ప్రకటించారు. కేవలం రాజధానిలోనే కాకుండా, రాష్ట్రంలోని అన్ని ప్రముఖ దేవాలయాల్లోనూ అర్చకులు, వేదపండితులు ఈ యాగాన్ని నిర్వహించి వర్షాలు కురవాలని దైవాన్ని ప్రార్థించాలని ఆమె కోరారు. శుక్రవారం హైదరాబాద్లోని రవీంద్రభారతిలో జరిగిన ఓ ప్రత్యేక కార్యక్రమంలో మంత్రి పాల్గొన్నారు. రాష్ట్రంలోని 47 ఆలయాలకు సంబంధించి వివిధ విభాగాల్లో ఎంపికైన 191 మంది అర్చకులు, వేదపండితులు, పరిచారకులు, వాద్య కళాకారులకు ఆమె నియామక పత్రాలను అందజేశారు.
ఈ సందర్భంగా మంత్రి కొండా సురేఖ మాట్లాడుతూ.. ఆలయాల నిర్వహణను మరింత పటిష్టం చేస్తామని స్పష్టం చేశారు. రాష్ట్రంలోని అన్ని దేవాలయాల నుంచి సమగ్ర నివేదికలను తెప్పించుకుంటామని, విధుల్లో ఉత్తమ సేవలు అందించిన సిబ్బందికి వచ్చే ఏడాది నుంచి ప్రత్యేక పురస్కారాలను అందజేసి సత్కరిస్తామని వెల్లడించారు. ఈ కార్యక్రమంలో దేవాదాయ శాఖ కార్యదర్శి శైలజారామయ్యర్, కమిషనర్ హనుమంతరావు, తెలంగాణ బ్రాహ్మణ పరిషత్ ఛైర్మన్ బసవరాజ్ శ్రీనివాస్, కేంద్ర మాజీ మంత్రి డాక్టర్ సముద్రాల వేణుగోపాలాచారి తదితరులు పాల్గొన్నారు.
దేవాదాయ శాఖలో సువర్ణ యుగం.. త్వరలో ఈవో పోస్టుల భర్తీ మరోవైపు, అర్చక పోస్టులను భారీగా భర్తీ చేయడం ద్వారా కాంగ్రెస్ ప్రభుత్వం అర్చక సంక్షేమానికి అత్యున్నత ప్రాధాన్యత ఇస్తోందని తెలంగాణ అర్చక ఉద్యోగ సంఘం ఐకాస కన్వీనర్ డీవీఆర్ శర్మ కొనియాడారు. దేవాదాయశాఖలో ప్రభుత్వం సువర్ణ యుగానికి శ్రీకారం చుట్టిందని ఆయన హర్షం వ్యక్తం చేశారు. వచ్చే వారంలోనే థర్డ్ గ్రేడ్ ఈవో (EO) పోస్టుల భర్తీ ప్రక్రియను కూడా ప్రారంభించనున్నట్లు ప్రభుత్వం ప్రకటించడంపై అర్చక సంఘాలు సంతోషం వ్యక్తం చేశాయి. ఈ నియామకాలు ఆలయాల పరిపాలనను మరింత మెరుగుపరుస్తాయని పేర్కొంటూ.. ఈ సందర్భంగా మంత్రి కొండా సురేఖను డీవీఆర్ శర్మ ఘనంగా సన్మానించారు.