ట్రాఫిక్ సమస్యకు లింకు రోడ్లతో చెక్.. వాహనాలను మెయిన్ రోడ్ల నుంచి చిన్న రోడ్లకు మళ్లించాలని ప్లాన్

రూ. 3.27 కోట్లతో నెక్నంపూర్ ​నుంచి అల్కాపూర్​ వైజంక్షన్​ అభివృద్ధి

హైదరాబాద్​సిటీ,వెలుగు: గ్రేటర్ లో ట్రాఫిక్ సమస్య నివారణకు హెచ్ఎండీఏ కొత్త ప్లాన్​వేసింది. మెయిన్​రోడ్లకు చిన్న చిన్నరూట్లను లింక్​ చేయడం ద్వారా ట్రాఫిక్​ సమస్యకు చెక్​ పెట్టాలని చూస్తున్నది. ఇందులో భాగంగా హైదరాబాద్ గ్రోత్ కారిడార్ ఆధ్వర్యంలో లింక్ రోడ్లను( షార్ట్ కట్) డెవలప్​చేయాలని నిర్ణయించారు.

మెయిన్​రోడ్లపైనే అత్యధికంగా వాహనాలు వెళ్తుండడంతో ట్రాఫిక్​ జామ్స్​తో పాటు పొల్యూషన్​సమస్యలు వేధిస్తున్నాయి. అందుకే మెయిన్​రోడ్లను కలిపే చిన్న చిన్న ప్రత్యామ్నాయ రోడ్లను అభివృద్ధి చేస్తే సమస్య పరిష్కారమవుతుందని భావిస్తున్నారు.

రూ. 3.27 కోట్ల ఖర్చు

ముందుగా హెచ్ఎండీఏ పరిధిలో కొన్ని ప్రాంతాలను ఎంపిక చేసుకుని చిన్నరోడ్లను మెయిన్​ రోడ్లతో లింక్​ చేయాలని అనుకుంటున్నారు. ఇందులో భాగంగా నెక్నాంపూర్ నుంచి అల్కాపురి రోడ్ ను విస్తరించి వై జంక్షన్ వద్ద కలిపి డెవలప్​చేయనున్నారు.

అల్కాపూర్​నుంచి పైప్​లైన్​రోడ్ ను కూడా ఎక్స్​టెండ్​చేయాలని ప్రపోజల్స్​రెడీ చేశారు. ఈ రెండు రోడ్లు 80 ఫీట్లు ఉంటాయని, పనుల కోసం రూ.3.27 కోట్లు వెచ్చించనున్నట్టు అధికారులు తెలిపారు. ఇప్పటికే టెండర్ల ప్రక్రియ కూడా పూర్తి చేశారు. 6 నెలల్లో పనులు పూర్తి చేయాలని లక్ష్యంగా పెట్టుకున్నారు.