హైదరాబాద్ సిటీలో గ్యాస్ కష్టాలు..బుక్ చేస్తే రెండు వారాల వరకు వస్తలేదు .. బ్లాక్ మార్కెట్లో అమ్ముకుంటున్న డీలర్లు, బాయ్స్

హైదరాబాద్​సిటీ, వెలుగు : జంటనగరాల్లో గ్యాస్​కష్టాలు తీరడం లేదు. గ్యాస్​సరఫరాలో కొరతతో కంపెనీలు కోరినంత ఇండెంట్​సరఫరా చేయడం లేదని డీలర్లు వాపోతున్నారు. దీంతో గ్యాస్​డెలివరీ ఆలస్యమవుతోందంటున్నారు. ఇంతేకాకుండా కమర్షియల్ సిలిండర్ల ధర పెంపు ప్రభావం డొమెస్టిక్​గ్యాస్​వినియోగదారులపై పడుతోంది.

సోమవారం కమర్షియల్​సిలిండర్ ధర రూ.66 వరకు పెరగ్గా, ప్రస్తుత​ధర రూ.3366 కు చేరింది. చాలా రోజుల నుంచే హోటళ్ల నిర్వాహకులు, టిఫిన్​సెంటర్లు, హాస్టల్స్​ఓనర్లు డొమెస్టిక్​ సిలిండర్లను బ్లాక్​లో కొనడానికి ఆసక్తి చూపిస్తున్నారు. దీన్ని క్యాష్​చేసుకునేందుకు కొందరు డీలర్లు నేరుగా సిలిండర్లను పక్కదారి పట్టిస్తుండగా, మరి కొందరు డెలివరీ బాయ్స్​ద్వారా దందా కొనసాగిస్తున్నారు. ప్రస్తుతం డొమెస్టిక్​సిలిండర్​ధర రూ.965 ఉండగా కొందరు రూ.2వేలకు అమ్ముకుంటున్నారు. రోజుకు బుకింగ్​లు లక్షన్నర గ్రేటర్​పరిధిలో 30 లక్షల గ్యాస్​కనెక్షన్లుండగా ఇంతకు ముందు రోజుకు 70 నుంచి 80 వేల బుకింగ్​లు జరిగేవి. కానీ, ప్రస్తుతం ఈ సంఖ్య లక్షన్నరకు చేరుకుంది. అయితే, డెలివరీ మాత్రం 70 నుంచి 80 వేలకు మించడం లేదు. 

పెరిగిన బుకింగ్​ తాకిడితో ఆయిల్​కంపెనీలు కఠిన నిబంధనలు అమలు చేస్తున్నాయి. సింగిల్​సిలిండర్​ఉన్న వారు ఇంతకు ముందు ఒక సిలిండర్​బుక్​ చేసుకున్న తర్వాత మరో సిలిండర్​బుక్​చేయడానికి 20 రోజులు ఆగాల్సి వచ్చేది. కానీ, తాజాగా దాన్ని 25 రోజులు చేశారు. అలాగే డబుల్​ సిలిండర్​ఉన్న వారికి ఇంతకుముందు 25 రోజులు ఉంటే ..ఇప్పుడు దాన్ని 30 రోజులు చేశారు. మరోవైపు సిలిండర్​బుక్​చేస్తే వారంలో డెలివరీ ఉంటుందని మెసేజ్​లు వస్తున్నాయి. కానీ, డెలివరీ అయ్యేసరికి రెండు వారాలు పడుతోంది. ఆలస్యమవుతోందని కొందరు వినియోగదారులు డీలర్లను సంప్రదిస్తే గ్యాస్​సరఫరా సరిగ్గా లేదని, వెయిట్​చేయక తప్పదని సమాధానం ఇస్తున్నారు.