ഫിറ്റ്നസ് മുതൽ ഡ്രൈവറുടെ ലൈസൻസ് വരെ; സ്കൂൾ വാഹനങ്ങളിൽ നിർബന്ധിത സ്റ്റിക്കർ
സ്കൂൾ വാഹനങ്ങളുടെ സുരക്ഷ കൂടുതൽ സുതാര്യമാക്കാൻ പുതിയ പദ്ധതിയുമായി മാവേലിക്കര റീജിയണൽ ട്രാൻസ്പോർട്ട് ഓഫീസ് (RTO). വാഹനത്തിന്റെ ഫിറ്റ്നസ്, ഇൻഷുറൻസ്, പെർമിറ്റ്, മലിനീകരണ നിയന്ത്രണ സർട്ടിഫിക്കറ്റ് എന്നിവയുടെ കാലാവധിക്കൊപ്പം ഡ്രൈവറുടെ ലൈസൻസ് വിവരങ്ങളും ഉൾപ്പെടുത്തിയ സ്റ്റിക്കർ എല്ലാ സ്കൂൾ വാഹനങ്ങളിലും നിർബന്ധമായും പതിപ്പിക്കുന്ന പദ്ധതിക്കാണ് തുടക്കമായത്.
'രക്ഷിതാക്കൾ സുരക്ഷാ കർത്താക്കൾ' എന്ന പേരിൽ കഴിഞ്ഞ വർഷം മോട്ടോർ വാഹന വകുപ്പ് ആരംഭിച്ച ബോധവത്കരണ പദ്ധതിയുടെ തുടർച്ചയായാണ് പുതിയ നടപടി. സ്കൂൾ വാഹനങ്ങളുടെ സുരക്ഷ ഉറപ്പാക്കുകയും വാഹനങ്ങളെക്കുറിച്ചുള്ള വിവരങ്ങൾ രക്ഷിതാക്കൾക്കും വിദ്യാർഥികൾക്കും എളുപ്പത്തിൽ ലഭ്യമാക്കുകയുമാണ് പദ്ധതിയുടെ ലക്ഷ്യം.
പുതിയ സ്റ്റിക്കറിൽ വാഹനത്തിന്റെ രജിസ്ട്രേഷൻ നമ്പർ, ഫിറ്റ്നസ് സർട്ടിഫിക്കറ്റിന്റെ കാലാവധി, പെർമിറ്റ്, ഇൻഷുറൻസ്, മലിനീകരണ നിയന്ത്രണ സർട്ടിഫിക്കറ്റ് എന്നിവയുടെ വിവരങ്ങൾ ഉൾപ്പെടുത്തും. ഇതിന് പുറമെ വാഹനം ഓടിക്കുന്ന ഡ്രൈവറുടെ പേര്, ലൈസൻസ് നമ്പർ, ലൈസൻസിന്റെ കാലാവധി എന്നിവയും രേഖപ്പെടുത്തും. ഈ സ്റ്റിക്കർ വാഹനത്തിന്റെ അകത്തും പുറത്തും വ്യക്തമായി കാണുന്ന വിധത്തിൽ പതിപ്പിക്കണമെന്നാണ് നിർദേശം. പദ്ധതിയുടെ ഉദ്ഘാടനം ചെന്നിത്തല ചെറുകോൽ മോഡൽ യു.പി. സ്കൂളിൽ നടന്നു. പ്ലസ് ടു പരീക്ഷയിൽ ഒരേ ക്ലാസിൽ പഠിച്ച് വിജയിച്ച ഇരട്ട വിദ്യാർഥികളാണ് പദ്ധതി ഉദ്ഘാടനം ചെയ്തത്. മാവേലിക്കര താലൂക്കിലെ എല്ലാ സ്കൂൾ വാഹനങ്ങളിലും പദ്ധതി നടപ്പാക്കുകയാണ് ലക്ഷ്യമെന്ന് മോട്ടോർ വാഹന വകുപ്പ് അറിയിച്ചു. പദ്ധതിക്കാവശ്യമായ സ്റ്റിക്കറുകൾ മാവേലിക്കര ഗ്രേറ്റർ ലയൺസ് ക്ലബ് സൗജന്യമായി തയ്യാറാക്കി നൽകിയിട്ടുണ്ട്.
സ്കൂൾ വാഹനങ്ങളുടെ സുരക്ഷയെക്കുറിച്ചുള്ള വിവരങ്ങൾ രക്ഷിതാക്കൾക്ക് നേരിട്ട് പരിശോധിക്കാൻ കഴിയുന്ന ഈ സംവിധാനം സുരക്ഷാ മാനദണ്ഡങ്ങൾ കൂടുതൽ ശക്തിപ്പെടുത്താൻ സഹായിക്കുമെന്നാണ് മോട്ടോർ വാഹന വകുപ്പിന്റെ പ്രതീക്ഷ.