306 വർഷത്തെ ചരിത്രം തിരുത്തി 18 കാരൻ; ലോകത്തിലെ ഏറ്റവും പ്രായം കുറഞ്ഞ പ്രൊഫസറായി നഥാൻ തോമസ്

പതിനെട്ടാം വയസ്സിൽ ഭൂരിഭാഗം കൗമാരക്കാരും ഒരു സർവകലാശാല തിരഞ്ഞെടുക്കുന്നതിനോ നല്ലൊരു കോളേജ് ജീവിതം ആരംഭിക്കുന്നതിനുമുള്ള തയ്യാറെടുപ്പിലായിരിക്കാം. എന്നാൽ ഫ്ലോറിഡയിൽ നിന്നുള്ള നഥാൻ തോമസ് എന്ന മിടുക്കൻ ഇതിനകം തന്നെ ഒരു ക്ലാസ് മുറിയുടെ മുന്നിൽ നിന്ന് എഞ്ചിനീയറിംഗ് വിദ്യാർത്ഥികളെ പഠിപ്പിച്ചുകൊണ്ട് ചരിത്രം സൃഷ്ടിച്ചിരിക്കുകയാണ്.
വെറും 18 വയസ്സു മാത്രം പ്രായമുള്ളപ്പോഴാണ് നഥാൻ ഗിന്നസ് വേൾഡ് റെക്കോർഡിൽ ഇടംനേടിയത്. ഇതോടെ, 306 വർഷമായി ആരും തകർക്കാതിരുന്ന റെക്കോർഡാണ് ഈ കൗമാരക്കാരൻ തന്റെ പേരിൽ കുറിച്ചത്. മിയാമി ഡേഡ് കോളേജിൽ എഞ്ചിനീയറിംഗ് ഇൻസ്ട്രക്ടറായി ചേർന്ന അദ്ദേഹം, തന്നേക്കാൾ ഒപ്പത്തിനൊപ്പം പ്രായമുള്ള വിദ്യാർത്ഥികൾക്ക് മുന്നിലാണ് അധ്യാപകനായി എത്തിയത്.
1717-ൽ, തന്റെ 19-ാം വയസ്സിൽ പ്രൊഫസറായി ചുമതലയേറ്റ സ്കോട്ടിഷ് ഗണിതശാസ്ത്രജ്ഞൻ കോളിൻ മക്ലൗറിന്റെ പേരിലുണ്ടായിരുന്ന റെക്കോർഡാണ് നഥാൻ തോമസ് ഇപ്പോൾ പഴങ്കഥയാക്കിയത്.