ജമ്മു കശ്മീർ ഇന്ത്യയുടെ പ്രധാന ഭാഗം എന്ന യുഎസ് സ്ഥാനപതിയുടെ പ്രസ്താവന കാര്യമാക്കേണ്ടതില്ലെന്ന് മെഹബൂബ മുഫ്തി

യുഎസ് സ്ഥാനപതി സെർജിയോ ഗോറിന്റെ ജമ്മു കാശ്മീർ പരാമർശത്തെ തള്ളിക്കളഞ്ഞ പിഡിപി അധ്യക്ഷ, ഒമർ അബ്ദുള്ളയുടെ സന്ദർശന രീതിയെ വിമർശിക്കുകയും കശ്മീരിലേക്കുള്ള അമേരിക്കയുടെ യാത്രാ വിലക്ക് പുനഃപരിശോധിക്കുന്നതിനെ പിന്തുണയ്ക്കുകയും ചെയ്തു
ജമ്മു കാശ്മീർ തർക്കത്തിൽ വാഷിംഗ്ടണിന്റെ പിന്തുണയ്ക്ക് വലിയ പ്രാധാന്യമുണ്ടെന്ന നിലപാടിനെ പിഡിപി അധ്യക്ഷ മെഹബൂബ മുഫ്തി തള്ളി. അമേരിക്ക നമ്മുടെ യജമാനന്മാരല്ലെന്നും ഈ പ്രദേശത്തിന്റെ കാര്യത്തിൽ സർട്ടിഫിക്കറ്റ് നൽകാൻ അവർക്ക് അവകാശമില്ലെന്നും അവർ പറഞ്ഞു.
യുഎസ് അംബാസഡർ സെർജിയോ ഗോർ ശ്രീനഗർ സന്ദർശിച്ച് ജമ്മു കശ്മീരിനെ "ഇന്ത്യയുടെ സുപ്രധാന ഭാഗം" എന്ന് വിശേഷിപ്പിച്ചതിന്റെ പിറ്റേന്നാണ് മെഹബൂബയുടെ ഈ പ്രതികരണം.
"യു എസിനെ അത്ര കാര്യമായി എടുക്കേണ്ട ഒരു ആവശ്യവുമില്ലെന്നാണ് ഞാൻ കരുതുന്നത്," മാധ്യമപ്രവർത്തകരോട് സംസാരിക്കവേ മുഫ്തി പറഞ്ഞു. "അവർ നമുക്ക് സർട്ടിഫിക്കറ്റ് നൽകിയാൽ മാത്രം ചർച്ചകൾ നടക്കുന്ന തരത്തിൽ അവർ നമ്മുടെ യജമാനന്മാരൊന്നുമല്ല."
വിയറ്റ്നാം മുതൽ ഇറാൻ വരെയുള്ള രാജ്യങ്ങളിലെ അമേരിക്കൻ ഇടപെടലുകളെ വിമർശിച്ച മുൻ ജമ്മു കശ്മീർ മുഖ്യമന്ത്രി, വാഷിംഗ്ടണിന്റെ ആഗോള സാമ്പത്തിക-രാഷ്ട്രീയ സ്വാധീനം ക്ഷയിച്ചുകൊണ്ടിരിക്കുകയാണെന്നും ആരോപിച്ചു.