ராணுவ ரகசியங்களை வாட்ஸ்-அப்பில் பகிர்ந்ததாக வேலூரில் ஓய்வுபெற்ற ராணுவ அதிகாரி கைது
வேலூர்: இந்திய ராணுவ ஆயுத தளவாடங்களின் திறன் மற்றும் அதன் இருப்பிட விவரங்களை வாட்ஸ்-அப் மூலம் பகிர்ந்ததாக ஓய்வுபெற்ற ராணுவ கேப்டனை வேலூர் கிராமிய போலீஸார் கைது செய்துள்ளனர்.
வேலூர் மாவட்டம் கணியம்பாடி அருகேயுள்ள வல்லம் கிராமத்தைச் சேர்ந்தவர் பாபு (52). ராணுவத்தில் 28 ஆண்டுகளாக பணியாற்றி கேப்டனாக பதவி உயர்வு பெற்று கடந்த 2022-ம் ஆண்டு ஓய்வுபெற்றுள்ளார். தற்போது, சென்னையில் உள்ள கல்லூரிகளில் என்சிசி மாணவர்களுக்குப் பயிற்சி அளித்து வருகிறார். இவர், கடந்த சில மாதங்களாக ராணுவ ரகசியங்களை சேகரித்து யாரோ ஒருவருக்குப் பகிர்ந்து வருவதாக மத்திய உளவுத்துறையினர் கண்டறிந்ததுடன் பாபுவிடம் விசாரணையும் நடத்தியுள்ளனர்.
இந்த தகவலை அடுத்து வேலூர் கிராமிய காவல் ஆய்வாளர் புனிதா, ஓய்வுபெற்ற ராணுவ அதிகாரி பாபுவிடம் விசாரணை நடத்தியதில் ஹைதராபாத்தில் இருப்பதாகக் கூறப்படும் பெண் ஒருவருக்கு வாட்ஸ்-அப் மூலம் இந்திய ராணுவ ஆயுத தளவாடங்களின் தகவல்களைப் பகிர்ந்தது உறுதி செய்யப்பட்டது.
பின்னர், பாபுவை போலீஸார் நேற்று கைது செய்து வேலூர் மத்தியச் சிறையில் அடைத்தனர்.
இதுதொடர்பாக, போலீஸ் அதிகாரிகள் கூறும்போது, “ராணுவத்தில் பல்வேறு பிரிவுகளில் நீண்ட காலம் பணியாற்றியுள்ள பாபு, டிஆர்டிஓ-வில் ஆயுதங்கள் சோதனை பிரிவில் சில காலம் பணியாற்றியுள்ளார். சமூக வலைத்தளம் மூலம் பாபுவுக்கு இளம் பெண் ஒருவர் கடந்த ஒன்றரை ஆண்டுக்கு முன்பு அறிமுகமாகியுள்ளார்.
தான் ஹைதராபாத்தில் வசித்து வருவதுடன் டிஆர்டிஓ ஆராய்ச்சி பிரிவில் இளநிலை அதிகாரியாக பணியாற்றி வருவதாகவும் அந்த இளம் பெண் கூறியுள்ளார். அடிக்கடி பாபுவிடம் வாட்ஸ்-அப் வீடியோ கால் மூலமும் பேசியுள்ளார். மேலும், அந்த பெண் தனது அந்தரங்க படங்களை பாபுவுக்கு பகிர்ந்துள்ளதாகக் கூறப்படுகிறது.
சில மாதங்களுக்கு முன்பு டிஆர்டிஓ ஆராய்ச்சி பணிக்காக இந்திய ராணுவத்தில் பயன்படுத்தப்படும் ஆயுத தளவாடங்களின் விவரங்களையும் அதன் துல்லிய தாக்குதல் திறன் குறித்தும் அந்த பெண் கேட்டுள்ளார். அதன் விவரங்களை பாபு பகிர்ந்ததுடன் முக்கிய தளவாடங்களின் தற்போதைய இருப்பிடங்கள் குறித்து தனக்குத் தெரிந்த சில ராணுவ வீரர்களிடம் கேட்டறிந்து அந்த பெண்ணுக்குப் பகிர்ந்துள்ளார்.
மேலும், இளம் பெண் கேட்டுக் கொண்டதற்காக பாபு தனது பெயரில் 5 சிம் கார்டுகளை வாங்கியுள்ளார். அந்த எண்களுக்கான வாட்ஸ்-அப் ஓடிபியை இளம் பெண்ணுக்கு பாபு பகிர்ந்துள்ளார். மத்திய உளவுத்துறை அதிகாரிகள் விசாரணைக்குப் பிறகு பாபு, தனது வாட்ஸ்-அப்பில் இருந்த அனைத்து உரையாடல் விவரங்களையும் அழித்துள்ளார். அவற்றை மீட்க நடவடிக்கை எடுக்கப்பட்டுள்ளது” என தெரிவித்தனர்.
