ವಯನಾಡು ಸಂತ್ರಸ್ತರಿಗೆ ಕಾಂಗ್ರೆಸ್ ಆಸರೆ: 100 ಮನೆಗಳ ನಿರ್ಮಾಣಕ್ಕೆ ರಾಹುಲ್ ಶಂಕುಸ್ಥಾಪನೆ

ವಯನಾಡು (ಕೇರಳ): 2024ರ ಭೀಕರ ಭೂಕುಸಿತದಿಂದ ಸರ್ವಸ್ವವನ್ನೂ ಕಳೆದುಕೊಂಡ ವಯನಾಡಿನ ಜನತೆಗೆ ಸಾಂತ್ವನ ನೀಡಲು ಮುಂದಾಗಿರುವ ಕಾಂಗ್ರೆಸ್ ನಾಯಕ ರಾಹುಲ್ ಗಾಂಧಿ, ಗುರುವಾರ ಸಂತ್ರಸ್ತರಿಗಾಗಿ ಪಕ್ಷದ ವತಿಯಿಂದ ನಿರ್ಮಿಸಲಿರುವ 100 ಮನೆಗಳ ನಿರ್ಮಾಣಕ್ಕೆ ಶಂಕುಸ್ಥಾಪನೆ ನೆರವೇರಿಸಿದರು. ಲೋಕಸಭೆಯ ವಿರೋಧ ಪಕ್ಷದ ನಾಯಕರಾಗಿರುವ ರಾಹುಲ್ ಗಾಂಧಿ, ಸಂತ್ರಸ್ತ ಕುಟುಂಬಗಳಿಗೆ ಭರವಸೆ ನೀಡುತ್ತಾ, "ನಾನು ಮತ್ತು ನನ್ನ ಕುಟುಂಬ ಯಾವಾಗಲೂ ನಿಮ್ಮ ಜೊತೆಗಿರುತ್ತೇವೆ" ಎಂದು ಭಾವುಕರಾಗಿ ನುಡಿದರು. "ನೀವು ಬಹಳಷ್ಟು ಕಳೆದುಕೊಂಡಿದ್ದೀರಿ, ಆದರೆ ನಿಮ್ಮ ಆತ್ಮಸ್ಥೈರ್ಯ ಮತ್ತು ಧೈರ್ಯವನ್ನು ಕಳೆದುಕೊಂಡಿಲ್ಲ.

 ಎಲ್ಲಕ್ಕಿಂತ ಮುಖ್ಯವಾಗಿ, ಸಂಕಷ್ಟದ ಸಮಯದಲ್ಲೂ ನೀವು ಮಾನವೀಯತೆಯನ್ನು ಬಿಟ್ಟಿಲ್ಲ" ಎಂದು ರಾಹುಲ್ ಶ್ಲಾಘಿಸಿದರು. ಮನೆಗಳ ನಿರ್ಮಾಣಕ್ಕೆ ಭೂಮಿ ಮತ್ತು ಅನುಮತಿಯ ವಿಷಯದಲ್ಲಿ ಉಂಟಾಗಿದ್ದ ವಿಳಂಬವು ಈಗ ಬಗೆಹರಿದಿದ್ದು, ಶೀಘ್ರದಲ್ಲೇ ಕಾಮಗಾರಿ ಪೂರ್ಣಗೊಳ್ಳಲಿದೆ ಎಂದು ಅವರು ಆಶಿಸಿದರು. ರಾಷ್ಟ್ರೀಯ ವಿಕೋಪ ಘೋಷಣೆಗೆ ಪ್ರಿಯಾಂಕಾ ಆಗ್ರಹ ವಯನಾಡು ಸಂಸದೆ ಪ್ರಿಯಾಂಕಾ ಗಾಂಧಿ ವಾದ್ರಾ ಮಾತನಾಡಿ, "ವಯನಾಡು ದುರಂತವನ್ನು ರಾಷ್ಟ್ರೀಯ ವಿಕೋಪ ಎಂದು ಘೋಷಿಸುವಂತೆ ನಮ್ಮ ಸಂಸದರೆಲ್ಲರೂ ಕೇಂದ್ರ ಗೃಹ ಸಚಿವರನ್ನು ಭೇಟಿ ಮಾಡಿ ಒತ್ತಾಯಿಸಿದ್ದೇವೆ. ಪ್ರಧಾನಿಯವರಿಗೂ ಪತ್ರ ಬರೆದು ಸಂಸತ್ತಿನ ಹೊರಗೆ ಪ್ರತಿಭಟನೆ ನಡೆಸಿದ್ದೇವೆ" ಎಂದು ಕೇಂದ್ರ ಸರ್ಕಾರದ ವಿಳಂಬ ನೀತಿಯನ್ನು ಟೀಕಿಸಿದರು.

"ದುರಂತ ಸಂಭವಿಸಿದಾಗ ನಾನು ಇಲ್ಲಿನ ಸಂಸದೆಯಾಗಿರಲಿಲ್ಲ, ಆದರೆ ಈಗ ನಾನು ಈ ಕುಟುಂಬದ ಮಗಳು ಮತ್ತು ಸಹೋದರಿಯಾಗಿದ್ದೇನೆ," ಎಂದು ಪ್ರಿಯಾಂಕಾ ಭಾವನಾತ್ಮಕವಾಗಿ ಹೇಳಿದರು. ಕಾಂಗ್ರೆಸ್ ಪಕ್ಷವು 100 ಮನೆಗಳನ್ನು ನಿರ್ಮಿಸುತ್ತಿದೆ, ಪ್ರತಿಯೊಂದೂ 1,100 ಚದರ ಅಡಿ ವಿಸ್ತೀರ್ಣ ಮತ್ತು 8 ಸೆಂಟ್ಸ್ ಭೂಮಿಯನ್ನು ಹೊಂದಿದೆ. ಆರ್ಥಿಕ ನೆರವು ವಿತರಣೆ ಇದೇ ಸಂದರ್ಭದಲ್ಲಿ ಭೂಕುಸಿತದಲ್ಲಿ ಅಂಗಡಿ-ಮುಂಗಟ್ಟುಗಳನ್ನು ಕಳೆದುಕೊಂಡ 40 ಜನರಿಗೆ ತಲಾ 5 ಲಕ್ಷ ರೂಪಾಯಿಗಳ ಚೆಕ್ ಅನ್ನು ನಾಯಕರು ವಿತರಿಸಿದರು. ಸಮಾರಂಭದಲ್ಲಿ ಕಾಂಗ್ರೆಸ್ ಮತ್ತು ಯುಡಿಎಫ್ (UDF) ಮೈತ್ರಿಕೂಟದ ಹಿರಿಯ ನಾಯಕರು ಉಪಸ್ಥಿತರಿದ್ದರು.