വിജയ് ദേവരകൊണ്ട - രശ്മിക വിവാഹം: ചോദ്യങ്ങളിൽ നിന്ന് ഒഴിഞ്ഞുമാറി റിഷബ് ഷെട്ടി

രശ്മിക മന്ദാനയും വിജയ് ദേവരകൊണ്ടയും തമ്മിലുള്ള വിവാഹത്തെക്കുറിച്ചുള്ള ചോദ്യങ്ങളോട് പ്രതികരിക്കാതെ സംവിധായകൻ റിഷബ് ഷെട്ടി. ചോദ്യം കേട്ടപ്പോൾ ഒരു ചിരിയോടെ അവിടെനിന്നും നടന്നുനീങ്ങുകയാണ് ചെയ്തത്

ഇന്ന് രാവിലെ ഉദയപൂരിൽ, അടുത്ത ബന്ധുക്കളും സുഹൃത്തുക്കളും പങ്കെടുത്ത സ്വകാര്യ ചടങ്ങിലായിരുന്നു വിജയ് ദേവരകൊണ്ട-രശ്മിക മന്ദാന വിവാഹം നടന്നത്. രാജ്യം മുഴുവൻ ഈ വിവാഹത്തെക്കുറിച്ച് ചർച്ച ചെയ്യുമ്പോഴാണ്, രശ്മികയുടെ ആദ്യ ചിത്രമായ 'കിറിക് പാർട്ടി'യുടെ സംവിധായകൻ കൂടിയായ റിഷബ് ഷെട്ടി ഇതിനോട് പ്രതികരിക്കാൻ വിസമ്മതിച്ചത്.

ശ്രീ രാഘവേന്ദ്ര ഗുരു വൈഭവോത്സവത്തിൽ പങ്കെടുക്കാൻ എത്തിയതായിരുന്നു റിഷബ്. പ്രശാന്ത് വർമ്മ സംവിധാനം ചെയ്യുന്ന തന്റെ പുതിയ ചിത്രം 'ജയ് ഹനുമാന്റെ' ലോഞ്ചിന് ശേഷമാണ് റിഷബ് അവിടെ എത്തിയത്. മാധ്യമങ്ങളോട് സംസാരിക്കവെ തന്റെ പുതിയ പ്രോജക്റ്റിനെക്കുറിച്ച് റിഷബ് വിശദീകരിച്ചു. സംസാരത്തിനിടയിൽ ഒരു റിപ്പോർട്ടർ, "രശ്മിക മന്ദാന വിവാഹിതയാകുകയാണല്ലോ, നിങ്ങൾക്ക് ക്ഷണം ലഭിച്ചോ?" എന്ന് ചോദിച്ചു. അതുവരെ ക്ഷമയോടെ മറുപടി നൽകിക്കൊണ്ടിരുന്ന റിഷബ്, ആ ചോദ്യം കേട്ടതും "താങ്ക്യൂ" എന്ന് പറഞ്ഞ് ചിരിച്ചുകൊണ്ട് അവിടെനിന്നും മടങ്ങി.

രശ്മികയുടെ വിവാഹവാർത്ത പുറത്തുവന്നതോടെ നടൻ രക്ഷിത് ഷെട്ടിയുമായുള്ള പഴയ നിശ്ചയം വീണ്ടും ചർച്ചയായിരിക്കുകയാണ്. 2017-ൽ നിശ്ചയം കഴിഞ്ഞെങ്കിലും 2018-ൽ ഇരുവരും വിവാഹത്തിൽ നിന്നും പിന്മാറുകയായിരുന്നു. 2023-ൽ രക്ഷിത് ഷെട്ടിയുടെ പ്രൊഡക്ഷൻ ഹൗസിനെക്കുറിച്ച് രശ്മിക നടത്തിയ ചില പരാമർശങ്ങൾ റിഷബ് ഷെട്ടിയെ ചൊടിപ്പിച്ചിരുന്നു. അത്തരം നടിമാരുമായി സഹകരിക്കാൻ തനിക്ക് താല്പര്യമില്ലെന്ന് അന്ന് റിഷബ് പരോക്ഷമായി പ്രതികരിച്ചിരുന്നു