ನಿಮ್ಮ ಕೆಲಸ ನೀವು ನೋಡಿ: ಅಮೆರಿಕದ ಅನುಮತಿ ಹೇಳಿಕೆಗೆ ಟ್ರಂಪ್ ವಿರುದ್ಧ ಕಮಲ್ ಹಾಸನ್ ವಾಗ್ದಾಳಿ

"ಭಾರತವು ಒಂದು ಸ್ವತಂತ್ರ ಮತ್ತು ಸಾರ್ವಭೌಮ ರಾಷ್ಟ್ರ. ನಾವು ಯಾವುದೇ ವಿದೇಶಿ ನೆಲದ ಆದೇಶಗಳನ್ನು ಪಾಲಿಸುವುದಿಲ್ಲ. ದಯವಿಟ್ಟು ನಿಮ್ಮ ಕೆಲಸವನ್ನು ನೀವು ನೋಡಿ," ಎಂದು ಮಕ್ಕಳ್ ನೀದಿ ಮೈಯಂ (MNM) ಅಧ್ಯಕ್ಷ ಹಾಗೂ ರಾಜ್ಯಸಭಾ ಸಂಸದ ಕಮಲ್ ಹಾಸನ್ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರಿಗೆ ಖಡಕ್ ಎಚ್ಚರಿಕೆ ನೀಡಿದ್ದಾರೆ. ಮಧ್ಯಪ್ರಾಚ್ಯದಲ್ಲಿ ಯುದ್ಧದ ಹಿನ್ನೆಲೆಯಲ್ಲಿ ಜಾಗತಿಕ ತೈಲ ಪೂರೈಕೆಯಲ್ಲಿ ವ್ಯತ್ಯಯ ಉಂಟಾಗಿರುವ ಬೆನ್ನಲ್ಲೇ, "ಭಾರತಕ್ಕೆ ರಷ್ಯಾ ತೈಲ ಖರೀದಿಸಲು ನಾವು ಅನುಮತಿ ನೀಡಿದ್ದೇವೆ" ಎಂಬ ಅಮೆರಿಕದ ಉನ್ನತ ಅಧಿಕಾರಿಯ ಹೇಳಿಕೆಗೆ ಕಮಲ್ ಹಾಸನ್ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದಾರೆ. ಸಾರ್ವಭೌಮತ್ವಕ್ಕೆ ಧಕ್ಕೆ ತರಬೇಡಿ ಸಾಮಾಜಿಕ ಜಾಲತಾಣ 'ಎಕ್ಸ್' (X) ನಲ್ಲಿ ಪೋಸ್ಟ್ ಮಾಡಿರುವ ಕಮಲ್ ಹಾಸನ್, "ಗೌರವಾನ್ವಿತ ಅಧ್ಯಕ್ಷರೇ, ನಾವು ಯಾರಿಗೂ ಅಧೀನರಲ್ಲ. 

ಸಾರ್ವಭೌಮ ರಾಷ್ಟ್ರಗಳ ನಡುವಿನ ಪರಸ್ಪರ ಗೌರವವೇ ಜಾಗತಿಕ ಶಾಂತಿಗೆ ಅಡಿಪಾಯ. ನಿಮ್ಮ ದೇಶದ ಅಭಿವೃದ್ಧಿಯ ಬಗ್ಗೆ ನೀವು ಗಮನಹರಿಸಿ," ಎಂದು ಬರೆದಿದ್ದಾರೆ. ವಿವಾದಕ್ಕೆ ಕಾರಣವೇನು? ಅಮೆರಿಕದ ಖಜಾನೆ ಕಾರ್ಯದರ್ಶಿ ಸ್ಕಾಟ್ ಬೆಸ್ಸೆಂಟ್ ಇತ್ತೀಚೆಗೆ ಖಾಸಗಿ ಚಾನೆಲ್‌ಗೆ ನೀಡಿದ ಸಂದರ್ಶನದಲ್ಲಿ, "ಭಾರತವು ರಷ್ಯಾದ ತೈಲ ಖರೀದಿಸುವುದನ್ನು ನಿಲ್ಲಿಸಿತ್ತು. ಆದರೆ ಈಗ ಜಾಗತಿಕ ತೈಲ ಕೊರತೆಯನ್ನು ನೀಗಿಸಲು ನಾವು ಅವರಿಗೆ ರಷ್ಯಾ ತೈಲವನ್ನು ಸ್ವೀಕರಿಸಲು 'ಅನುಮತಿ' ನೀಡಿದ್ದೇವೆ," ಎಂದು ಹೇಳಿದ್ದರು. ಈ 'ಅನುಮತಿ' ಎಂಬ ಪದವು ಭಾರತದ ರಾಜಕೀಯ ವಲಯದಲ್ಲಿ ಭಾರಿ ಆಕ್ರೋಶಕ್ಕೆ ಕಾರಣವಾಗಿದೆ.