Kerala assembly polls: ಶೇ. 85ಕ್ಕೂ ಅಧಿಕ ಮತದಾನದ ಗುರಿ: ಕೇರಳ ಮುಖ್ಯ ಚುನಾವಣಾಧಿಕಾರಿ

ತಿರುವನಂತಪುರಂ: ಮುಂಬರುವ ಕೇರಳ ವಿಧಾನಸಭಾ ಚುನಾವಣೆಯಲ್ಲಿ ದಾಖಲೆಯ ಶೇ. 85ಕ್ಕಿಂತ ಹೆಚ್ಚು ಮತದಾನವಾಗುವಂತೆ ಮಾಡಲು ಯೋಜನಾಬದ್ಧವಾಗಿ ಸಿದ್ಧತೆ ನಡೆಸಲಾಗುತ್ತಿದೆ ಎಂದು ಕೇರಳದ ಮುಖ್ಯ ಚುನಾವಣಾಧಿಕಾರಿ (CEO) ರತನ್ ಯು. ಕೇಲ್ಕರ್ ಶುಕ್ರವಾರ ತಿಳಿಸಿದ್ದಾರೆ. ಜಿಲ್ಲಾ ಚುನಾವಣಾಧಿಕಾರಿಗಳಿಗಾಗಿ ಆಯೋಜಿಸಲಾಗಿದ್ದ ತರಬೇತಿ ಕಾರ್ಯಾಗಾರದಲ್ಲಿ ಮಾತನಾಡಿದ ಅವರು, ಈ ಬಾರಿಯ ಚುನಾವಣೆಯನ್ನು ಸುಗಮ ಮತ್ತು ಜನಸ್ನೇಹಿಯಾಗಿ ನಡೆಸಲು ಚುನಾವಣಾ ಆಯೋಗವು ಕಟಿಬದ್ಧವಾಗಿದೆ ಎಂದರು.

 ಐತಿಹಾಸಿಕ ದಾಖಲೆ ಮುರಿಯುವ ವಿಶ್ವಾಸ 1987ರ ವಿಧಾನಸಭಾ ಚುನಾವಣೆಯಲ್ಲಿ ದಾಖಲಾಗಿದ್ದ ಗರಿಷ್ಠ ಶೇ. 80.5ರಷ್ಟು ಮತದಾನದ ದಾಖಲೆಯನ್ನು ಈ ಬಾರಿ ಮೀರಿಸುವುದು ಆಯೋಗದ ಪ್ರಮುಖ ಗುರಿಯಾಗಿದೆ. ಚುನಾವಣಾ ಆಯೋಗವು ಶೇ. 85ರ ಗುರಿ ನೀಡಿದ್ದರೂ, ಅದಕ್ಕಿಂತಲೂ ಹೆಚ್ಚಿನ ಪ್ರಮಾಣದ ಮತದಾನ ನಡೆಯುವಂತೆ ಮಾಡಲು ಆಯೋಗ ಉತ್ಸುಕವಾಗಿದೆ ಎಂದು ಹೇಳಿದರು. ಮತದಾರರನ್ನು ಸೆಳೆಯಲು 'ಮಾದರಿ ಮತಗಟ್ಟೆ': 'ಪ್ರಜಾಪ್ರಭುತ್ವದ ಹಬ್ಬ' ಎಂಬ ಘೋಷಣೆಯನ್ನು ಕೇವಲ ಮಾತಿಗೆ ಸೀಮಿತಗೊಳಿಸದೆ, ಮತದಾರರಿಗೆ ಒಂದು ಉತ್ತಮ ಅನುಭವ ನೀಡಲು ಆಯೋಗ ಮುಂದಾಗಿದೆ.ಪರಿಸರ ಸ್ನೇಹಿ ಬೂತ್‌ಗಳು: ವಾಯು ಮತ್ತು ಶಬ್ದ ಮಾಲಿನ್ಯ ರಹಿತವಾದ, ಸ್ವಚ್ಛ ಮತ್ತು ಮಾದರಿ ಮತಗಟ್ಟೆಗಳನ್ನು ಸ್ಥಾಪಿಸಲಾಗುವುದು. ದಿವ್ಯಾಂಗರಿಗೆ ಅನುಕೂಲವಾಗುವಂತೆ ವೀಲ್‌ಚೇರ್ ಸ್ನೇಹಿ ಮತದಾನದ ಟೇಬಲ್‌ಗಳು ಮತ್ತು ಮತದಾರರಿಗೆ ಲಘು ಪಾನೀಯದ ವ್ಯವಸ್ಥೆಯನ್ನು ಮಾಡಲಾಗುವುದು. ವೋಟರ್ ಲಿಸ್ಟ್: ಮತದಾರರ ಪಟ್ಟಿ ಪರಿಷ್ಕರಣೆ ಅಂತಿಮ ಹಂತದಲ್ಲಿದ್ದು, ಸುಮಾರು 15 ಲಕ್ಷಕ್ಕೂ ಅಧಿಕ ಹೊಸ ಅರ್ಜಿಗಳು ಸಲ್ಲಿಕೆಯಾಗಿವೆ. ಚುನಾವಣಾ ದಿನಾಂಕ ಘೋಷಣೆಯಾದ ತಕ್ಷಣವೇ ನೀತಿ ಸಂಹಿತೆ ಜಾರಿಗೆ ಬರಲಿದ್ದು, ಆ ಬಳಿಕ ಎಲ್ಲಾ ರಾಜಕೀಯ ಪಕ್ಷಗಳೊಂದಿಗೆ ಸಭೆ ನಡೆಸಿ ಚುನಾವಣಾ ಪ್ರಕ್ರಿಯೆಗೆ ಸಹಕಾರ ಕೋರಲಾಗುವುದು ಎಂದು ಅವರು ಮಾಹಿತಿ ನೀಡಿದರು. ಕೇರಳದ ಚುನಾವಣಾ ಮಾದರಿಯನ್ನು ವಿಶ್ವಕ್ಕೇ ಮಾದರಿಯಾಗಿಸುವ ಗುರಿಯನ್ನು ಆಯೋಗ ಹೊಂದಿದೆ.