కేంద్రం సంచలన నిర్ణయం.. బంకుల్లో పెట్రోల్, డీజిల్ అమ్మకాలపై ఆంక్షలు.. రోజుకు 200 లీటర్లే!

న్యూఢిల్లీ: దేశంలో పెట్రోల్, డీజిల్ విక్రయాలపై కేంద్ర ప్రభుత్వం కీలక ఆంక్షలు విధించింది. పారిశ్రామిక, వాణిజ్య, సంస్థాగత (Industrial, Commercial, Institutional) వినియోగదారులు సాధారణ పెట్రోల్ బంకుల నుండి ఇంధనాన్ని కొనుగోలు చేయకుండా కేంద్రం నిరోధించింది. వీరంతా తమకు కావలసిన ఇంధనాన్ని కేవలం 'బల్క్ సేల్ పాయింట్ల' (Bulk Sale Points) నుండే సేకరించాలని అధికారిక ఉత్తర్వుల్లో స్పష్టం చేసింది. ప్రాథమికంగా 90 రోజుల పాటు అమలులో ఉండే ఈ ఆంక్షలు తక్షణమే వర్తిస్తాయని ప్రభుత్వం పేర్కొంది. బల్క్ ధరలకు, రిటైల్ ధరలకు మధ్య ఉన్న భారీ వ్యత్యాసం కారణంగా పెద్ద పెద్ద పరిశ్రమలు సాధారణ బంకుల నుండి ఇంధనాన్ని కొనుగోలు చేస్తుండటంతో, కొన్ని ప్రాంతాల్లో డీజిల్‌కు అసాధారణ డిమాండ్ పెరిగింది. ఈ నేపథ్యంలోనే ప్రభుత్వం ఈ నిర్ణయం తీసుకోవలసి వచ్చింది. ప్రస్తుతం ఢిల్లీలో లీటర్ డీజిల్ ధర సాధారణ బంకుల్లో రూ. 95.20 ఉండగా, బల్క్ కొనుగోలుదారులకు అది రూ. 134.50 గా ఉంది.

ఫిబ్రవరి చివరి వారంలో పశ్చిమ ఆసియా (West Asia) సంక్షోభం కారణంగా అంతర్జాతీయంగా ఇంధన ధరలు భారీగా పెరిగాయి. అయితే, సాధారణ వినియోగదారులపై ఆ భారం పడకుండా ప్రభుత్వ రంగ చమురు సంస్థలు రిటైల్ ధరలను నియంత్రించాయి. కానీ, టెలికాం టవర్లు, విద్యుత్ ఉత్పత్తి మరియు ఇతర పారిశ్రామిక అవసరాల కోసం డీజిల్‌ను పెద్ద మొత్తంలో వాడే 'బల్క్ వినియోగదారుల'కు మాత్రం అంతర్జాతీయ మార్కెట్ ధరలనే వసూలు చేస్తున్నారు. దీనివల్ల రిటైల్ బంకుల ధరలు, వాస్తవ ఉత్పత్తి వ్యయం కంటే చాలా తక్కువగా ఉన్నాయి. ఈ వ్యత్యాసాన్ని ఆసరాగా చేసుకుని పరిశ్రమలు బంకుల వైపు మళ్లాయి. దీనిని అరికట్టేందుకు కేంద్ర పెట్రోలియం మంత్రిత్వ శాఖ జూన్ 11న ‘మోటార్ స్పిరిట్ అండ్ హై స్పీడ్ డీజిల్ (టెంపరరీ రెగ్యులేషన్ ఆఫ్ సప్లై త్రూ రిటైల్ అవుట్‌లెట్స్) ఆర్డర్, 2026’ ను జారీ చేసింది.