ఒప్పందం కుదిరింది..హమాస్ ఆయుధాలు వదిలేస్తున్నారు..ఇదో చారిత్రాత్మక ఘట్టం: ట్రంప్
న్యూఢిల్లీ: హమాస్ ఆయుధాలు వదిలేందుకు, గాజా నుంచి ఇజ్రాయెల్ బలగాలు క్రమంగా వైదొలగడానికి ఒక ఒప్పందం కుదిరిందని అమెరికా అధ్యక్షుడు డొనాల్డ్ ట్రంప్ గురువారం ప్రకటించారు. ఈ పరిణామం ఆ ప్రాంతం కోసం ఆయన గతంలో ప్రతిపాదించిన 20-సూత్రాల శాంతి ప్రణాళికలోని కీలక అంశాల అమలుకు మార్గం సుగమం చేయనుంది. తొమ్మిది నెలల క్రితం అమెరికా మధ్యవర్తిత్వంతో కాల్పుల విరమణ ఒప్పందం కుదిరినప్పటికీ.. రెండో దశ అమలుపై ఇజ్రాయెల్, -హమాస్ మధ్య చర్చలు నిలిచిపోయాయి. ఈ నేపథ్యంలో ఈ తాజా ఒప్పందం కుదిరిందని ట్రంప్ సోషల్ మీడియా వేదికగా తెలిపారు. ఒక సోషల్ మీడియా పోస్ట్లో ట్రంప్ ఈ ఒప్పందాన్ని ఒక చరిత్రాత్మక పురోగతిగా అభివర్ణించారు.
ఇది విస్తృత గాజా ఫ్రేమ్వర్క్ను ఆచరణలోకి తీసుకురావడంలో ఒక ప్రధాన ముందడుగు అని పేర్కొన్నారు. ‘ఈ రోజు గాజాలోని హమాస్, ఇతర సాయుధ గ్రూపులన్నింటినీ పూర్తిగా నిరాయుధీకరణ చేసేందుకు శాంతి మండలి ఒక చారిత్రాత్మక ఒప్పందాన్ని కుదుర్చుకుంది. శాశ్వత శాంతి, భద్రత దిశగా ఇది ఒక గొప్ప ముందడుగు’ అని ట్రంప్ అన్నారు. ఈ ఒప్పందం చివరికి గాజాలో ఒక కొత్త పాలస్తీనా పరిపాలనకు దారితీస్తుందని, అదే సమయంలో ఇజ్రాయెల్ భద్రతాపరమైన ఆందోళనలను కూడా పరిష్కరిస్తుందని ఆయన స్పష్టం చేశారు. ‘పాలస్తీనా ప్రజలకు సహాయం చేయడానికి శాంతి మండలితో కలిసి పనిచేసే ఒక కొత్త పాలస్తీనా ప్రభుత్వం చివరకు గాజాను పరిపాలించే దిశగా ఈ ఒప్పందం ఒక కీలకమైన ముందడుగు.
అదే సమయంలో, గాజా ఇకపై ఉగ్రవాద దాడులకు స్థావరంగా ఉపయోగించనందున, ఇజ్రాయెల్కు భద్రత లభిస్తుంది’ అని ట్రంప్ అన్నారు. ఈ ఒప్పందం దశలవారీగా అమల్లోకి వస్తుందని, హమాస్ నిరాయుధీకరణ ఇజ్రాయెల్ బలగాల ఉపసంహరణతో ముడిపడి ఉంటుందని కూడా ట్రంప్ చెప్పారు. ట్రంప్ 20-సూత్రాల ప్రణాళిక అమలులో ఇది ఒక ప్రధాన మైలురాయి. ఈ ఒప్పందం జాగ్రత్తగా రూపొందించిన దశల్లో అమలవుతుంది. నిరాయుధీకరణ పూర్తయిన తర్వాత, ఇజ్రాయెల్ దళాలు ఉపసంహరించుకుంటాయి. గాజా దాని నివాసితులకు, పొరుగువారికి సురక్షితంగా ఉండే బాధ్యతను స్వీకరించడానికి ఇంటర్నేషనల్స్టెబిలైజేషన్ఫోర్స్.. కొత్త పాలస్తీనా పోలీసు ఫోర్స్తో కలిసి పనిచేస్తుందని ట్రంప్ పేర్కొన్నారు.