21-ാം വയസിൽ പൈലറ്റിന്റെ ഭാര്യയായി; നടി മല്ലിക ഷെരാവത്തും മുൻ ഭർത്താവും പിരിയാനുണ്ടായ കാരണം പുറത്ത്

ധീരമായ വേഷങ്ങളിലൂടെയും തുറന്ന നിലപാടുകളിലൂടെയും വ്യത്യസ്തമായ തീരുമാനങ്ങളിലൂടെയും ശ്രദ്ധ നേടിയ താരമാണ് ബോളിവുഡ് നടി മല്ലിക ഷെരാവത്ത് (Mallika Sherawat). എന്നാൽ ബോളിവുഡിലെ ‘മല്ലിക’യായി മാറുന്നതിന് മുൻപ് ഹരിയാനയിലെ ഹിസാർ ജില്ലയിലെ മോത്ത് എന്ന ചെറുഗ്രാമത്തിൽ നിന്നുള്ള റീമ ലാംബയായിരുന്നു അവർ എന്ന കാര്യം അധികമാർക്കും അറിയില്ല. പിന്നീട് ‘മല്ലിക’ എന്ന പേരിൽ സിനിമാലോകത്ത് പ്രശസ്തയായ അവർ ആരാധകരുടെ ഹൃദയങ്ങളിൽ ഇടംനേടി. ജെറ്റ് എയർവേയ്‌സിലെ പൈലറ്റായ കരൺ സിംഗ് ഗില്ലിനെ വിവാഹം കഴിക്കുമ്പോൾ മല്ലികയ്ക്ക് 21 വയസ്സ് മാത്രമായിരുന്നു പ്രായം. അന്ന് റീമ ലാംബ എന്ന പേരിലാണ് അവർ അറിയപ്പെട്ടിരുന്നത്
മല്ലികയുടേത് പ്രണയവിവാഹമായിരുന്നെങ്കിലും, ഗ്ലാമർ ലോകത്തേക്ക് കടന്നുവരാനുള്ള അവരുടെ തീരുമാനത്തിന് പിന്നാലെ ഇരുവരും വേർപിരിഞ്ഞു. പതിറ്റാണ്ടുകളായി ആരാധകരുടെ പ്രിയതാരമായി തുടരുന്ന മല്ലിക, തന്റെ വിവാഹത്തെയും വിവാഹമോചനത്തെയും കുറിച്ച് പിന്നീട് കാര്യമായി പ്രതികരിച്ചിട്ടില്ല. 2009ൽ മല്ലിക ഷെരാവത്തിന്റെ മുൻകാല ജീവിതത്തെക്കുറിച്ചുള്ള അധികമാർക്കും അറിയാത്ത ചില വിവരങ്ങൾ ‘സ്റ്റാർഡസ്റ്റ്’ മാസിക പുറത്തുവിട്ടിരുന്നു. മല്ലികയുടെ അമ്മാവൻ സുശീൽ ലാംബയുമായി നടത്തിയ സംഭാഷണത്തിൽ അവരുടെ മുൻകാല ജീവിതത്തെക്കുറിച്ചും വിവാഹമോചനത്തിലേക്ക് നയിച്ച സാഹചര്യങ്ങളെക്കുറിച്ചും അദ്ദേഹം വിശദീകരിച്ചിരുന്നു (തുടർന്ന് വായിക്കുക)
“സൗഹൃദം വളർന്നതോടെ ഇരുവരും വിവാഹിതരാകാൻ തീരുമാനിച്ചു. പ്രണയവും കുടുംബങ്ങളുടെ സമ്മതവും ചേർന്ന വിവാഹമായിരുന്നു അവരുടേത്. ഇരു കുടുംബങ്ങളിലെയും അംഗങ്ങൾ വിവാഹത്തിൽ പങ്കെടുത്തു. ഡൽഹിയിൽ വലിയൊരു സൽക്കാരവും സംഘടിപ്പിച്ചിരുന്നു,” സുശീൽ ലാംബ പറഞ്ഞതായി ‘സ്റ്റാർഡസ്റ്റ്’ റിപ്പോർട്ട് ചെയ്തു. “എപ്പോഴും സമ്പന്നയും പ്രശസ്തയുമാകണമെന്ന ആഗ്രഹം അവൾക്കുണ്ടായിരുന്നു. ഗില്ലുമായുള്ള പ്രണയമാണ് അദ്ദേഹത്തെ വിവാഹം കഴിക്കാൻ അവളെ പ്രേരിപ്പിച്ചത്. എന്നാൽ ദാമ്പത്യജീവിതം അവൾക്ക് അനുയോജ്യമായിരുന്നില്ല. തുടർന്ന് വിവാഹബന്ധം ഉപേക്ഷിച്ച് സ്വതന്ത്രമായ ജീവിതം നയിക്കാൻ അവൾ തീരുമാനിച്ചു. മാതാപിതാക്കൾ ഉൾപ്പെടെ ഇരുകുടുംബങ്ങളും അവളുടെ തീരുമാനത്തെ എതിർത്തു. ഇതിനെ തുടർന്ന് കുടുംബാംഗങ്ങളുമായി വലിയ അഭിപ്രായവ്യത്യാസങ്ങളുണ്ടായി,” അദ്ദേഹം പറഞ്ഞതായി റിപ്പോർട്ടിൽ പറയുന്നു
“ഞങ്ങൾ കേട്ടറിഞ്ഞതനുസരിച്ച്, മരുമകളെ സിനിമയിൽ അഭിനയിക്കാൻ അയക്കുന്നതിനോട് ഭർതൃവീട്ടുകാർക്ക് താൽപ്പര്യമുണ്ടായിരുന്നില്ല. രാത്രി വൈകിയുള്ള വരവും പോക്കും പാർട്ടികളിൽ പങ്കെടുക്കുന്നതും അവർക്ക് ഇഷ്ടപ്പെട്ടിരുന്നില്ല. ഇതേത്തുടർന്ന് റീമയും കരണും തമ്മിൽ അഭിപ്രായവ്യത്യാസങ്ങൾ ഉടലെടുത്തു. ഒരുപക്ഷേ ഇതായിരിക്കാം അവരുടെ വേർപിരിയലിന് കാരണമായത്,” സുശീൽ ലാംബ പറഞ്ഞതായി ‘സ്റ്റാർഡസ്റ്റ്’ റിപ്പോർട്ട് ചെയ്തു
മല്ലിക ഷെരാവത്തിനെ അറിയില്ലെന്നും റീമ ലാംബ എന്ന പേരിലുള്ള യുവതിയെ മാത്രമേ അറിയുമായിരുന്നുള്ളൂവെന്നും അവരുടെ മുൻ ഭർതൃമാതാവും ‘സ്റ്റാർഡസ്റ്റിനോട്’ പറഞ്ഞിരുന്നു. “അവൾ എന്റെ മരുമകളായിരുന്നു. ഞങ്ങൾക്കെല്ലാം അവളെ വളരെ ഇഷ്ടമായിരുന്നു. എന്നാൽ പിന്നീട് അവളുടെ പെരുമാറ്റവും സ്വതന്ത്രമായ ജീവിതശൈലിയും ഞങ്ങൾക്ക് പ്രശ്നങ്ങൾ സൃഷ്ടിക്കാൻ തുടങ്ങി,” മുൻ ഭർതൃമാതാവ് പറഞ്ഞതായി മാസിക റിപ്പോർട്ട് ചെയ്തു. “സ്വതന്ത്രമായി ചിന്തിക്കുന്നതിനൊപ്പം കുടുംബത്തിന്റെ ആവശ്യങ്ങളും മനസ്സിലാക്കുന്ന ഒരു പെൺകുട്ടിയെയായിരുന്നു ഞങ്ങൾ ആഗ്രഹിച്ചിരുന്നത്. എന്നാൽ അവളുടെ സ്വപ്നങ്ങൾ ഞങ്ങളുടെ പ്രതീക്ഷകളിൽനിന്ന് വ്യത്യസ്തമായിരുന്നു. ഗ്ലാമർ മേഖലയിൽ കരിയർ കെട്ടിപ്പടുക്കാനായിരുന്നു അവളുടെ ആഗ്രഹം,” അവർ പറഞ്ഞു
മല്ലികയുമായുള്ള വിവാഹമോചനത്തിന് ശേഷം കരൺ സിംഗ് ഗിൽ വീണ്ടും വിവാഹിതനായതായാണ് റിപ്പോർട്ടുകൾ. മല്ലികയുമായി ഇനി യാതൊരു ബന്ധവും പുലർത്താൻ അദ്ദേഹം താൽപ്പര്യപ്പെടുന്നില്ലെന്നും റിപ്പോർട്ടുകളുണ്ട്. അതേസമയം, മല്ലിക ഷെരാവത്ത് അഭിനയരംഗത്ത് സജീവമായി തുടരുകയാണ്. ‘ദി ട്രെയ്റ്റേഴ്സ്’ രണ്ടാം സീസണിൽ താരത്തെ കാണാം