എട്ടാം ശമ്പള കമ്മീഷനെക്കുറിച്ചുള്ള ചര്‍ച്ചകള്‍ എല്ലായിടത്തും സജീവമാണ്. കേന്ദ്ര സര്‍ക്കാര്‍ ജീവനക്കാരും പെന്‍ഷന്‍കാരും കമ്മീഷനെക്കുറിച്ചുള്ള ഔദ്യോഗിക പ്രഖ്യാപനങ്ങള്‍ക്കായി ആകാംക്ഷയോടെ കാത്തിരിക്കുകയാണ്. ഫിറ്റ്മെന്റ് ഫാക്ടര്‍, വീട്ടുവാടക അലവന്‍സ്, അടിസ്ഥാന ശമ്പളം എന്നിവയുമായി ബന്ധപ്പെട്ട വിവരങ്ങള്‍ അതീവ താല്‍പ്പര്യത്തോടെയാണ് എല്ലാവരും നിരീക്ഷിക്കുന്നത്.
ഫിറ്റ്മെന്റ് ഫാക്ടര്‍ വര്‍ധിപ്പിക്കണമെന്ന് ജീവനക്കാരുടെ സംഘടനകള്‍ നിരന്തരം ആവശ്യപ്പെടുന്ന സാഹചര്യത്തില്‍, വീട്ടുവാടക അലവന്‍യിലും അടിസ്ഥാന ശമ്പളത്തിലുമുണ്ടാകാന്‍ സാധ്യതയുള്ള വര്‍ധനവിനെക്കുറിച്ചാണ് ഏറ്റവും വലിയ ആകാംക്ഷ നിലനില്‍ക്കുന്നത്. ജീവനക്കാരന്റെ നിലവിലുള്ള അടിസ്ഥാന ശമ്പളത്തെ പരിഷ്‌കരിച്ച അടിസ്ഥാന ശമ്പളത്തിലേക്ക് മാറ്റാന്‍ ശമ്പള കമ്മീഷന്‍ ഉപയോഗിക്കുന്ന ഗുണകമാണ് ഫിറ്റ്മെന്റ് ഫാക്ടര്‍.

ഇത് 3.0 ആയി ഉയര്‍ത്തിയാല്‍, ലെവല്‍-7 ഉദ്യോഗസ്ഥരുടെ പ്രതിമാസ വീട്ടുവാടക അലവന്‍സ 40,000 രൂപ കടന്നേക്കാം. ഏഴാം ശമ്പള കമ്മീഷന്‍ പ്രകാരം, പേ ലെവല്‍-7-ലെ അടിസ്ഥാന ശമ്പളം നിലവില്‍ പ്രതിമാസം 44,900 രൂപയാണ്. വിവിധ സര്‍ക്കാര്‍ വകുപ്പുകളിലെ ഇന്‍സ്പെക്ടര്‍മാരും സെക്ഷന്‍ ഓഫീസര്‍മാരും ഈ ലെവലില്‍ ഉള്‍പ്പെടുന്നു. എട്ടാം ശമ്പള കമ്മീഷന്‍ ഫിറ്റ്മെന്റ് ഫാക്ടര്‍ 3.0 ആയി നിശ്ചയിക്കുകയാണെങ്കില്‍, അടിസ്ഥാന ശമ്പളം മൂന്നിരട്ടിയായി വര്‍ധിച്ച് പ്രതിമാസം 1,34,700 രൂപയാകും.
വീട്ടുവാടക അലവന്‍സ് കണക്കാക്കുന്നത് അടിസ്ഥാന ശമ്പളത്തിന്റെ ഒരു നിശ്ചിത ശതമാനം അടിസ്ഥാനമാക്കിയായതിനാല്‍, അടിസ്ഥാന ശമ്പളത്തിലുണ്ടാകുന്ന വലിയ വര്‍ധനവ് സ്വാഭാവികമായും വീട്ടുവാടക അലവന്‍സിലും ഗണ്യമായ വര്‍ധനവിന് കാരണമാകും. ജീവനക്കാരന്‍ ജോലി ചെയ്യുന്ന നഗരത്തിന്റെ വര്‍ഗ്ഗീകരണത്തെ ആശ്രയിച്ചാണ് വീട്ടുവാടക അലവന്‍സ് നിരക്കുകള്‍ നിശ്ചയിക്കുന്നത്.
നിലവില്‍, 'X' വിഭാഗം നഗരങ്ങള്‍ക്ക് (ഡല്‍ഹി, മുംബൈ തുടങ്ങിയ മെട്രോ നഗരങ്ങള്‍) 30%, 'Y' വിഭാഗം നഗരങ്ങള്‍ക്ക് (ടയര്‍-2 നഗരങ്ങള്‍) 20%, 'Z' വിഭാഗം നഗരങ്ങള്‍ക്ക് (ചെറിയ പട്ടണങ്ങള്‍) 10% എന്നിങ്ങനെയാണ് നിരക്കുകള്‍. 3.0 ഫിറ്റ്മെന്റ് ഫാക്ടര്‍ വഴി അടിസ്ഥാന ശമ്പളം 1,34,700 രൂപയായി മാറുകയാണെങ്കില്‍, പ്രതിമാസ വീട്ടുവാടക അലവന്‍സ് 'X' വിഭാഗം നഗരങ്ങളില്‍ 40,410 രൂപയാകും.
'Y' വിഭാഗം നഗരങ്ങളില്‍ 26,940 രൂപയും, 'Z' വിഭാഗം നഗരങ്ങളില്‍ 13,470 രൂപയുമായിരിക്കും. സര്‍ക്കാര്‍ 2.5 ഫിറ്റ്മെന്റ് ഫാക്ടര്‍ നടപ്പിലാക്കാന്‍ തീരുമാനിച്ചാല്‍, പേ ലെവല്‍-7 ഉദ്യോഗസ്ഥരുടെ അടിസ്ഥാന ശമ്പളം 1,12,250 രൂപ ആയി ഉയരും. ഈ സാഹചര്യത്തില്‍, 'X' വിഭാഗം നഗരങ്ങളില്‍ ജോലി ചെയ്യുന്ന ജീവനക്കാര്‍ക്ക് പ്രതിമാസം 33,675 വീട്ടുവാടക അലവന്‍സ് ലഭിക്കും. 'Y' വിഭാഗം നഗരങ്ങളിലുള്ളവര്‍ക്ക് 22,450-രൂപയും 'Z' വിഭാഗം നഗരങ്ങളിലുള്ളവര്‍ക്ക് 11,225 രൂപയും ആയിരിക്കും ലഭിക്കുക.