சிறு தொழில்கள் ஏ.ஐ-க்கு மாற மத்திய அரசு தரும் ஊக்கம்- தரக் கட்டுப்பாட்டில் ஒரு புதிய புரட்சி

புதுடெல்லி:

இந்தியாவின் பொருளாதார வளர்ச்சியில் முதுகெலும்பாகத் திகழும் சிறு, குறு மற்றும் நடுத்தர தொழில் நிறுவனங்கள் (MSMEs), இனி செயற்கை நுண்ணறிவு (AI) தொழில்நுட்பத்தின் உதவியுடன் உலகத் தரத்திற்கு உயரவுள்ளன. தரக்கட்டுப்பாடு, இயந்திரப் பராமரிப்பு மற்றும் சுற்றுச்சூழல் பாதுகாப்பு எனப் பல்வேறு துறைகளில் ஏ.ஐ. ஏற்படுத்தப்போகும் மாற்றங்கள் குறித்து சமீபத்தில் நடைபெற்ற 'இண்டியா ஏ.ஐ. இம்பாக்ட் சமீட்' மாநாட்டில் அதிகாரிகள் விரிவாகப் பேசினர்.

இந்தியாவில் சுமார் 7.6 கோடிக்கும் அதிகமான சிறு, குறு, நடுத்தர தொழில் நிறுவனங்கள் உள்ளன. இதில் ஐந்தில் ஒரு பங்கு நிறுவனங்கள் உற்பத்தித் துறையில் (Manufacturing) ஈடுபட்டுள்ளன. ஏற்கனவே டிஜிட்டல் மயமான துறைகளை விட, இந்த பாரம்பரிய உற்பத்தித் துறைகளில் ஏ.ஐ. தொழில்நுட்பத்தைப் புகுத்துவதுதான் இந்தியாவின் தேசிய வருமானத்தை (National Income) கணிசமாக உயர்த்தும் என்று ஜவுளி அமைச்சகத்தின் கூடுதல் செயலாளர் ரோஹித் கன்சால் தெரிவித்துள்ளார்.

ஏ.ஐ. மூலம் சாத்தியமாகும் மாற்றங்கள்:

மாநாட்டில் கொள்கை வகுப்பாளர்கள் சுட்டிக்காட்டிய சில முக்கிய உதாரணங்கள்: துணிகளில் நெசவு அல்லது சாயமிடுதலில் ஏற்படும் குறைபாடுகளை இயந்திரங்கள் இயங்கிக் கொண்டிருக்கும்போதே (Real-time) ஏ.ஐ. மூலம் கண்டறிதல்.
 இயந்திரங்கள் எப்போது பழுதாகும் என்பதை முன்கூட்டியே கணித்து, வேலை நிறுத்தப்படுவதைத் தடுத்தல் (Predictive Maintenance). இருமல் மருந்து போன்ற தயாரிப்புகளில் கலப்படம் இருந்தால், அந்த நச்சுப் பொருள் எந்த மூலப்பொருளிலிருந்து வந்தது என்பதைத் துல்லியமாகக் கண்டறிதல்.
 தொழிற்சாலைகளின் கழிவு வெளியேற்றம் மற்றும் எரிசக்தி பயன்பாட்டை பழைய தரவுகளைக் கொண்டு கணக்கிடாமல், உடனுக்குடன் (Real-time) கண்காணித்தல்.

அரசு மற்றும் தனியார் பங்களிப்பு

பெரிய நிறுவனங்கள் தங்களுக்குத் தேவையான ஏ.ஐ. தொழில்நுட்பத்தில் முதலீடு செய்ய நிதி வசதி பெற்றுள்ளன. ஆனால், ஜவுளி மற்றும் தோல் பொருட்கள் போன்ற பாரம்பரியத் துறைகளில் உள்ள சிறிய நிறுவனங்களுக்கு அரசின் ஆதரவு அவசியம் என்று மின்னணு மற்றும் தகவல் தொழில்நுட்ப அமைச்சகத்தின் (MeitY) செயலாளர் எஸ். கிருஷ்ணன் குறிப்பிட்டார்.
 இதற்காக ஏதெனா இன்போனோமிக்ஸ் (Athena Infonomics) மற்றும் தேசிய மின்-ஆளுமை நிறுவனம் (NISG) இணைந்து, சிறு, குறு, நடுத்தர தொழில் நிறுவனங்களில் AI தாக்கத்தை ஆராயும் புதிய ஆய்வு ஒன்றைத் தொடங்கியுள்ளன.
 "இந்த மாற்றத்தை தொழில்துறையினரே முன்னெடுத்துச் செல்ல வேண்டும். தனியார் முதலீடு வராத இடங்களில், கொள்கை மாற்றங்கள் மற்றும் நிதி ஆதாரங்கள் மூலம் அரசு துணை நிற்கும்" என்று எம்.எஸ்.எம்.இ. செயலாளர் எஸ்.சி.எல் தாஸ் உறுதி அளித்துள்ளார்.

உலகளாவிய போட்டியைச் சமாளிக்க AI அவசியம்

இன்றைய காலகட்டத்தில் சர்வதேச வாங்குபவர்கள் (Global Buyers) குறைந்த விலையை விட, நிலையான தரம் மற்றும் நம்பகமான விநியோகத்தையே எதிர்பார்க்கிறார்கள். உற்பத்திச் சங்கிலியில் நடப்பவற்றைத் துல்லியமாகப் பார்க்க ஏ.ஐ. உதவுகிறது.
 தரக்கட்டுப்பாட்டுக்கான செலவுகளைக் குறைத்து, சர்வதேசத் தரத்திற்கு இந்தியத் தயாரிப்புகளைக் கொண்டு செல்ல முடியும். மிக முக்கியமாக, ஏ.ஐ. என்பது மனித உழைப்பைத் திருடும் கருவி அல்ல; 
மாறாக இது வேலை இழப்பு இல்லாமல் உற்பத்தியையும் தரத்தையும் மேம்படுத்தும் ஒரு கருவியாகப் பார்க்கப்பட வேண்டும் என்று கன்சால் வலியுறுத்தினார்.

அடுத்த கட்ட நடவடிக்கைகள்

சிறு தொழில்கள் எளிதாக ஏ.ஐ.-க்கு மாற, பொதுவான டிஜிட்டல் கட்டமைப்புகள் (Shared Digital Infrastructure) மற்றும் குறைந்த கட்டணத்திலான சேவைகள் உருவாக்கப்பட வேண்டும். 
எம்.எஸ்.எம்.இ. நிறுவனங்களுக்கு ஒரு 'ஏ.ஐ தீர்வுத் தொகுப்பு' (Shelf of AI solutions) வழங்கப்படலாம், அதிலிருந்து அவர்கள் தங்களுக்குத் தேவையானதைத் தேர்ந்தெடுத்துப் பயன்படுத்திக் கொள்ளலாம். முடிவாக, இந்தியா உற்பத்தியில் பின்தங்கிவிடாமல் இருக்கவும், சந்தைக்குத் தயாராக இருக்கவும் ஏ.ஐ. தொழில்நுட்பத்தைத் தழுவுவது இப்போது காலத்தின் கட்டாயம்.