‘നോർവേയുടെ പായിക്കപ്പലുകൾ തകർത്ത് ഇംഗ്ലണ്ടിന്റെ നാവികപ്പട; ഹാളണ്ടിനെ പട്ടിണിക്കിട്ട് ബെല്ലിംഗ്ഹാമിന്റെ വിജയഗാഥ’

ലോകകപ്പ് യോഗ്യതാ പോരാട്ടത്തിൽ നോർവേയെ വീഴ്ത്തി ഇംഗ്ലണ്ട്. തുഴ നഷ്ടപ്പെട്ട പായിക്കപ്പലുകൾ പോലെ നിസ്സഹായരായി നോർവേ കളിക്കാർ. എക്സ്ട്രാ ടൈമിൽ ബെല്ലിംഗ്ഹാമിന്റെ ഗോളിൽ ഇംഗ്ലണ്ടിന് ജയം. സോഷ്യൽ മീഡിയയിൽ ഫുട്ബാൾ ആരാധകരുടെ ഭാ​ഗത്തുനിന്നുയരുന്ന നിരീക്ഷണങ്ങളാണിത്. മത്സരത്തിന്റെ ആദ്യ മിനിറ്റുകൾ മുതൽ മൈതാനം ഇംഗ്ലണ്ടിന്റെ പൂർണ നിയന്ത്രണത്തിലായിരുന്നു. നോർവേയുടെ കാലുകൾക്ക് പന്ത് തൊടാൻ പോലും അവസരം നൽകാതെ ഇംഗ്ലീഷ് താരങ്ങൾ കളം വാണു. “സൂര്യനസ്തമിക്കാത്ത സാമ്രാജ്യം” പോലെ മൈതാനം നിറയെ ഇംഗ്ലണ്ടിന്റെ ആധിപത്യം. നോർവേയുടെ സൂപ്പർ താരം എർലിംഗ് ഹാളണ്ടിന് കഞ്ഞിക്കുള്ള ടച്ച് പോലും കിട്ടാത്ത അവസ്ഥ. കാലുകളിൽ വിശപ്പുമായി ഹാളണ്ട് ഗാലറിയിലെ കാഴ്ചക്കാരനായി.

ആദ്യ പകുതിയിൽ നോർവേയുടെ പതിനൊന്ന് കളിക്കാരും ഗാലറിയിലിരുന്ന് കളി കാണുകയായിരുന്നുവെന്ന് വേണം പറയാൻ. ഇംഗ്ലണ്ട് താരങ്ങളുടെ പന്തിണക്കത്തിന്റെയും കാൽപൊരുത്തത്തിന്റെയും കൃത്യത നോക്കിക്കാണുക മാത്രമാണ് നോർവേക്ക് കഴിഞ്ഞത്. ഒരു കാലിൽ നിന്ന് മറ്റൊരു കാലിലേക്ക് തടസ്സമില്ലാതെ പന്ത് പാഞ്ഞപ്പോൾ നോർവേ നിര നിസ്സഹായരായി. രണ്ടാം പകുതിയിൽ നോർവേയുടെ കാലിൽ പന്ത് കിട്ടിയ നിമിഷം ഗാലറിയിൽ ഗോളടിച്ചതിലും വലിയ ആഹ്ലാദം പടർന്നു. നഷ്ടപ്പെട്ട തുഴകൾ തിരിച്ചുകിട്ടിയ പായിക്കപ്പലുകളെപ്പോലെയായി നോർവേ. ഇംഗ്ലണ്ട് വൈസ്രോയി ഹാരി കെയ്‌നിന്റെ കാലിൽ നിന്ന് പന്ത് കവർന്നെടുത്ത് നോർവേ നടത്തിയത് പെനാൽറ്റി ബോക്സിലേക്കുള്ള “ഒന്നാം സ്വാതന്ത്ര്യസമരം”. പന്തവകാശം എപ്പോഴും ഗോളവകാശത്തെ നിർണ്ണയിക്കുന്നില്ലെന്ന് നോർവേ തെളിയിച്ചു. ഇംഗ്ലണ്ടിന്റെ പരമാധികാരത്തിന്റെ വല തുളച്ചതോടെ നോർവേ തുടർ സമരങ്ങൾക്ക് തുടക്കമിട്ടു. സ്വാതന്ത്ര്യം പോലെ പന്തിനെ ആഘോഷിച്ച് നോർവേ താരങ്ങൾ മുന്നേറി. എന്നാൽ ഇംഗ്ലണ്ടിന്റെ കുതിരപ്പട നായകൻ ജൂഡ് ബെല്ലിംഗ്ഹാം നടത്തിയ “കാൽമരുന്നു പ്രയോഗ”ത്തെ തടുക്കാൻ നോർവേ പ്രതിരോധത്തിനായില്ല. വളരെ മുൻപേ ഇംഗ്ലണ്ടിന് ലഭിക്കേണ്ടിയിരുന്ന ഗോളാണ് ബെല്ലിംഗ്ഹാമിലൂടെ പിറന്നത്. നോർവേയുടെ ആദ്യത്തെ കപ്പൽഛേദം. കളി എക്സ്ട്രാ ടൈമിലേക്ക് നീണ്ടു. എക്സ്ട്രാ ടൈമിന്റെ മൂന്നാം നോട്ടിക്കൽ മൈലിൽ വെച്ച് നോർവേയുടെ അവസാനത്തെ പായിക്കപ്പലിനെയും പെനാൽറ്റി ബോക്സിൽ മുക്കി ബെല്ലിംഗ്ഹാം. ഇംഗ്ലണ്ടിന്റെ നാവികപ്പടയുടെ വിജയം പൂർണ്ണം. ഒടുവിൽ തുഴകളെല്ലാം നഷ്ടപ്പെട്ട്, കരയും കടലും നഷ്ടപ്പെട്ട് നോർവേ പരാജയം സമ്മതിച്ചു. ഇംഗ്ലണ്ട് ലോകകപ്പ് യോഗ്യതാ പോരാട്ടത്തിൽ നിർണായക ജയം സ്വന്തമാക്കി.