'ഞാൻ ഉദ്ദേശിച്ചത് 56-കാരനായ യുവാവിനെയല്ല'; രാഹുൽ ഗാന്ധിക്കെതിരെ ഒളിയമ്പുമായി പ്രധാനമന്ത്രി മോദി

ലോക്സഭാ പ്രതിപക്ഷ നേതാവ് രാഹുൽ ഗാന്ധിക്കെതിരെ ഒളിയമ്പുമായി പ്രധാനമന്ത്രി നരന്ദ്ര മോദി. വിക്രം-1 വിജയകരമായി വിക്ഷേപിച്ച സ്കൈറൂട്ട് എയറോസ്പേസിന് പിന്നിലെ യുവതലമുറയെ പ്രശംസിക്കവെ, താൻ ഉദ്ദേശിച്ചത് 56 വയസ്സുള്ള ഒരു 'യുവാവിനെ'ക്കുറിച്ചല്ലെന്ന് പറഞ്ഞാണ് പ്രതിപക്ഷ നേതാവ് രാഹുൽ ഗാന്ധിക്കെതിരെ പ്രധാനമന്ത്രി പരോക്ഷ വിമർശനമുന്നയിച്ചത്.

സ്കൈറൂട്ടിന്റെ ഭാഗമായവരുടെ ശരാശരി പ്രായം വെറും 28 വയസ്സ് മാത്രമാണെന്ന് ചൂണ്ടിക്കാട്ടിയ പ്രധാനമന്ത്രി, ഇന്ത്യൻ യുവാക്കൾ ബഹിരാകാശത്ത് പുതിയൊരു യാത്രയ്ക്ക് തുടക്കം കുറിച്ചിരിക്കുകയാണെന്നും ഇവരെപ്പോലെയുള്ള യുവാക്കളാണ് ഈ നേട്ടം കൈവരിച്ചതെന്നും കൂട്ടിച്ചേർത്തു. ഇതിന് പിന്നാലെയായിരുന്നു കോൺഗ്രസ് നേതാവ് രാഹുൽ ഗാന്ധിയെ ലക്ഷ്യമിട്ട്, താൻ 56 വയസ്സുള്ള യുവാവിനെക്കുറിച്ചല്ല സംസാരിക്കുന്നതെന്ന രാഷ്ട്രീയ പരിഹാസം പ്രധാനമന്ത്രി നടത്തിയത്. പാർലമെന്റിന്റെ മൺസൂൺ സമ്മേളനത്തിന് മുന്നോടിയായി ഡൽഹിയിൽ മാധ്യമപ്രവർത്തകരെ അഭിസംബോധന ചെയ്യുകയായിരുന്നു അദ്ദേഹം.പാർലമെന്റിന്റെ മൺസൂൺ സമ്മേളനം സജീവവും ഫലപ്രദവുമായിരിക്കണമെന്ന് പ്രധാനമന്ത്രി നരേന്ദ്ര മോദി ജനപ്രതിനിധികളോട് ആഹ്വാനം ചെയ്തു. വസ്തുതകളുടെ അടിസ്ഥാനത്തിൽ അർത്ഥവത്തായ ചർച്ചകളിൽ പങ്കാളികളാകാൻ അദ്ദേഹം ആവശ്യപ്പെട്ടു

ഇന്ത്യയുടെ ആഗോള പദവി ഉയരുന്നു യുവ ഇന്ത്യക്കാരുടെ നേട്ടങ്ങൾ രാജ്യത്തിന്റെ ആഗോള പദവി ഉയർത്തുകയും ലോകമെമ്പാടും ഇന്ത്യയിലുള്ള വിശ്വാസം വർദ്ധിപ്പിക്കുകയും ചെയ്യുന്നുവെന്ന് പ്രധാനമന്ത്രി പറഞ്ഞു. ഒരു മാസത്തിനുള്ളിൽ രാജ്യം നിരവധി നാഴികക്കല്ലുകൾ കൈവരിച്ചിട്ടുണ്ട്. ദേശീയ തലത്തിലായാലും അന്താരാഷ്ട്ര തലത്തിലായാലും ബഹിരാകാശത്തായാലും ഇത് ഇന്ത്യയ്ക്ക് യഥാർത്ഥത്തിൽ അഭിമാന നിമിഷങ്ങളാണെന്ന് അദ്ദേഹം ഓർമ്മിപ്പിച്ചു. കഴിഞ്ഞ മൺസൂൺ സമ്മേളനത്തിന് തൊട്ടുമുമ്പ് ഒരു ഇന്ത്യൻ ബഹിരാകാശയാത്രികൻ അന്താരാഷ്ട്ര ബഹിരാകാശ നിലയത്തിലേക്ക് യാത്ര ചെയ്ത കാര്യം അനുസ്മരിച്ച അദ്ദേഹം, ഒരു സ്വകാര്യ ഇന്ത്യൻ സ്റ്റാർട്ടപ്പിന്റെ സമീപകാല നേട്ടം മറ്റൊരു നിർണ്ണായക നിമിഷമാണെന്ന് വ്യക്തമാക്കി. ഇന്ത്യയുടെ ആഗോള പദവിക്ക് അന്താരാഷ്ട്ര തലത്തിൽ വലിയ അംഗീകാരവും സ്വീകാര്യതയും ലഭിക്കുന്നത് യാദൃശ്ചികമല്ലെന്നും നമ്മുടെ രാജ്യത്തെ യുവാക്കളുടെ ഊർജ്ജവും ലക്ഷ്യങ്ങളും ബഹിരാകാശത്തെപ്പോലെ തന്നെ അതിരുകളില്ലാത്തതാണെന്നതിന്റെ തെളിവാണിതെന്നും അദ്ദേഹം കൂട്ടിച്ചേർത്തു.