വർത്തമാനകാല പ്രതിസന്ധികളെ മറികടക്കാൻ എംഗൽസിയൻ വായന അനിവാര്യം: കെ.ടി. കുഞ്ഞിക്കണ്ണൻ

യുദ്ധവും വംശീയതയും മുതലാളിത്ത ചൂഷണങ്ങളും തീവ്രമായിക്കൊണ്ടിരിക്കുന്ന വർത്തമാനകാലത്ത് മാർക്സിസ്റ്റ് തത്വചിന്തകനായ ഫ്രെഡറിക് എംഗൽസിന്റെ ആശയങ്ങൾക്ക് പ്രസക്തിയേറുന്നുവെന്ന് മുതിർന്ന ചിന്തകനും രാഷ്ട്രീയ നിരീക്ഷകനുമായ കെ.ടി. കുഞ്ഞിക്കണ്ണൻ. എംഗൽസിന്റെ ഓർമ്മദിനത്തിൽ എഴുതിയ ഫേസ്ബുക്ക് കുറിപ്പിലാണ് അദ്ദേഹം ഈ നിരീക്ഷണം പങ്കുവെച്ചത്.
മനുഷ്യർ പ്രത്യയശാസ്ത്രപരമായ മിഥ്യാധാരണകളിലേക്ക് തള്ളിവിടപ്പെടുകയും മിത്തും വിശ്വാസവും ദൈവവുമെല്ലാം വലിയ രീതിയിൽ ചർച്ചയാവുകയും ചെയ്യുന്ന ഇന്നത്തെ സാമൂഹ്യ സന്ദർഭത്തിൽ എംഗൽസിനെ വായിക്കേണ്ടത് അത്യന്താപേക്ഷിതമാണ്. മാർക്സിസത്തെയും മനുഷ്യരാശിയുടെ വളർച്ചയ്ക്ക് സംഭാവന നൽകിയ ദർശനങ്ങളെയും ഭയപ്പെടുന്ന വിജ്ഞാനവിരോധികളാണ് ഫാസിസ്റ്റുകളെന്ന് അദ്ദേഹം ഓർമ്മിപ്പിച്ചു.
ലോകം മുഴുവൻ മിഥ്യയാണെന്നും അമാനുഷിക ശേഷിയുള്ള ശക്തരാണ് ചരിത്രം സൃഷ്ടിക്കുന്നതെന്നും വിശ്വസിക്കുന്നവരാണ് മനുഷ്യരാശിയുടെ ശത്രുക്കൾ. ശ്രേഷ്ഠ വംശങ്ങളെയും വ്യക്തികളെയും ഇതിനായി ദൈവം സൃഷ്ടിച്ചിട്ടുണ്ടെന്ന ആശയവാദത്തിലധിഷ്ഠിതമായ പ്രയോജനവാദമോ അജ്ഞേയവാദമോ ആണ് അവരുടെ ദർശനമെന്നും ഫേസ്ബുക്ക് കുറിപ്പിൽ ചൂണ്ടിക്കാണിക്കുന്നു.
തത്വചിന്തയിലെ മൗലികമായ ചോദ്യമായ ചിന്തയും അസ്തിത്വവും തമ്മിലുള്ള ബന്ധത്തെക്കുറിച്ചുള്ള സംവാദങ്ങളിലൂടെയാണ് ജ്ഞാനസിദ്ധാന്തം വികസിച്ചത്. ഈ മേഖലയിൽ ഇടപെട്ട് ‘അറിവിന്റെ സാമൂഹ്യശാസ്ത്രം’ വികസിപ്പിച്ചതാണ് മാർക്സിന്റെയും എംഗൽസിന്റെയും പ്രധാന സംഭാവനയെന്ന് കെ.ടി. കുഞ്ഞിക്കണ്ണൻ വ്യക്തമാക്കുന്നു.
മാർക്സിസത്തിന്റെ ജ്ഞാനസിദ്ധാന്തപരമായ മേഖല വിപുലീകരിക്കുന്നതിൽ എംഗൽസ് വലിയ പങ്ക് വഹിച്ചിട്ടുണ്ട്. ‘പ്രകൃതിയുടെ വൈരുധ്യാത്മകത’, ‘ആന്റി ഡ്യൂറിങ്’, ‘കുടുംബം, സ്വകാര്യസ്വത്ത്, ഭരണകൂടം’, ‘ലൂദ്വിഗ് ഫൊയർബാഹും ജർമ്മൻ തത്വചിന്തയുടെ അന്ത്യവും’ തുടങ്ങിയ രചനകളിലൂടെ മാർക്സിസത്തെ ഒരു ശാസ്ത്രീയ ദർശനമായി എംഗൽസ് നിർദ്ധാരണം ചെയ്തു.
പ്രകൃതിയുടെയും സമൂഹത്തിന്റെയും ചലനനിയമങ്ങൾ പഠിക്കുന്നതിൽ മാർക്സിന് തന്നെ എംഗൽസ് വഴികാട്ടിയായിരുന്നു. എംഗൽസിന്റെ ‘അർത്ഥശാസ്ത്ര വിമർശനത്തിനൊരു രൂപരേഖ’ എന്ന ലേഖനമാണ് മാർക്സിനെ സാമ്പത്തികശാസ്ത്ര പഠനത്തിലേക്ക് തിരിച്ചതും തുടർന്ന് ‘മൂലധനം’ എന്ന ബൃഹത് ഗ്രന്ഥത്തിന്റെ രചനയിലേക്ക് നയിച്ചതും. എക്കാലത്തെയും പ്രമാണമാത്രവാദങ്ങളെ (Dogmatism) നിരാകരിച്ച് മാർക്സിസത്തിന് ശാസ്ത്രീയ അടിത്തറ പാകിയ വിപ്ലവകാരിയാണ് എംഗൽസെന്നും കുറിപ്പ് ഓർമ്മിപ്പിക്കുന്നു.