అమెరికా గ్రీన్ కార్డ్ దరఖాస్తుదారులకు బిగ్ షాక్: సెప్టెంబర్ 18 నుంచి కొత్త రూల్స్

అమెరికాలో గ్రీన్ కార్డ్ పొందాలనుకునే వారికి ట్రంప్ సర్కార్ ఒక కీలక ప్రకటన చేసింది. అమెరికా పౌరసత్వం వలస సేవల సంస్థ (USCIS) ప్రభుత్వ సాయంపై ఆధారపడే నిబంధనలకు సంబంధించి కొత్త మార్గదర్శకాలను జారీ చేసింది. ఈ కొత్త రూల్స్ సెప్టెంబర్ 18, 2026 నుంచి అధికారికంగా అమల్లోకి రానున్నాయి. 

అమెరికాలో గ్రీన్ కార్డ్ కోసం దరఖాస్తు చేసుకునే వారు ప్రభుత్వ సాయంపై ఆధారపడకుండా స్వయంసమృద్ధిగా ఉండాలనే ఉద్దేశంతో ఈ మార్పులు తెచ్చారు. దీనికోసం 2022 నాటి పబ్లిక్ ఛార్జ్ నిబంధనలను హోమ్‌ల్యాండ్ సెక్యూరిటీ విభాగం రద్దు చేసింది. సెప్టెంబర్ 18 లేదా ఆ తర్వాత సమర్పించే అన్ని Form I-485 దరఖాస్తులకు ఈ కొత్త నిబంధనలు వర్తిస్తాయి. పాత ఫారమ్‌లను అధికారులు ఇకపై అంగీకరించరు.

సెప్టెంబర్ 18, 2026 తర్వాత ప్రభుత్వం నుంచి ఏ విధమైన ఆర్థిక సహాయాలు, సంక్షేమ పథకాలు అంటే ఫుడ్ స్టాంప్స్, హౌసింగ్ సాయం, కాలేజీ ఫీజు సాయం వంటివి పొందినా అది దరఖాస్తుపై నెగటివ్ ప్రభావం చూపుతుంది. సెప్టెంబర్ 18కి ముందు తీసుకున్న సహాయాలకు పాత నిబంధనలే వర్తిస్తాయి కానీ.. ఆ తేదీ తర్వాత తీసుకునే ప్రతి ప్రభుత్వ సాయాన్ని అధికారులు పరిగణలోకి తీసుకుంటారు.