നിറഞ്ഞ സദസ്സിൽ പ്രദർശനം തുടരുന്ന ബത്‍ലഹേം കുടുംബ യൂണിറ്റ് ബോക്സോഫീസ് റെക്കോർഡുകൾ മറികടക്കുമ്പോൾ സംവിധായകൻ ​ഗിരീഷ് എഡി പുതിയ നേട്ടത്തിലേക്ക് എത്തുകയാണ്. തുടർച്ചയായി രണ്ട് ചിത്രങ്ങൾ നൂറ് കോടി ക്ലബ്ബിലെത്തുന്ന സംവിധായകനെന്ന പേര് ഇനി ​ഗിരീഷ് എഡിക്കും സ്വന്തം.
ഇതിന് മുൻപ് പൃഥ്വിരാജ് സുകുമാരൻ മാത്രമാണ് ഈ നേട്ടത്തിൽ ഉണ്ടായിരുന്നത്. പൃഥ്വിരാജ് സംവിധാനം ചെയ്ത ലൂസിഫർ, എംപുരാൻ എന്നീ ചിത്രങ്ങൾ നൂറ് കോടി ക്ലബ്ബ് കടന്നിരുന്നു. ലൂസിഫർ ആ​ഗോള കളക്ഷനിൽ 128 കോടിയും എംപുരാൻ 268 കോടിയുമാണ് നേടിയത്.
2024 ൽ പ്രദർശനത്തിനെത്തിയ ഗിരീഷ് എഡിയുടെ പ്രേമലു ആ​ഗോള തലത്തിൽ 136 കോടി കരസ്ഥമാക്കിയിരുന്നു. ഇപ്പോൾ ആറ് ദിവസം കൊണ്ടാണ് ബത്‍ലഹേം കുടുംബ യൂണിറ്റ് നൂറ് കോടി ക്ലബ്ബിലെത്തിയത്. പ്രമുഖ ട്രേഡ് ട്രാക്കർമാരായ സാക്നിൽക്കിന്റെ കണക്കുകൾ പ്രകാരം ചിത്രം ഇതിനകം 128 കോടി നേടി. ഇതോടെ മലയാളത്തിലെ മുൻനിര സംവിധായകരിലേക്ക് ​ഗിരീഷ് എഡി ഉയർന്നു.