ഇന്ത്യൻ പ്രീമിയം മാമ്പഴങ്ങൾക്ക് നോ എൻട്രി; നിർണായക തീരുമാനവുമായി ജപ്പാൻ, തീരുമാനത്തിന് കാരണം

20 വഷങ്ങൾക്കുശേഷമാണ് ഇന്ത്യയിൽ നിന്ന് മാമ്പഴം ഇറക്കുമതി ചെയ്യുന്നതുമായി ബന്ധപ്പെട്ട് ജപ്പാനിൽ വീണ്ടും വിലക്കേർപ്പെടുത്തിയിരിക്കുന്നത്. കീട നിയന്ത്രണത്തിലും വേപ്പർ ഹീറ്റ് ട്രീറ്റ്മെന്റ് (വിഎച്ച്ടി) സൗകര്യങ്ങളുമായി ബന്ധപ്പെട്ട സർട്ടിഫിക്കേഷൻ പ്രക്രിയകളിലും പോരായ്മകൾ ക്വാറന്റൈൻ അധികൃതർ കണ്ടെത്തിയതിനെത്തുടർന്നാണ് ജപ്പാൻ ഇന്ത്യൻ മാമ്പഴങ്ങളുടെ ഇറക്കുമതി താൽക്കാലികമായി നിരോധിച്ചിരിക്കുന്നത്.

കയറ്റുമതി ചെയ്യുന്നതിന് മുമ്പ് മാമ്പഴത്തിന്റെ അണുനാശിനി സംസ്കരണം ഈ കേന്ദ്രങ്ങൾ കൈകാര്യം ചെയ്യുന്നതിനാൽ പഴ ഈച്ചകൾ പോലുള്ള കീടങ്ങളിൽ നിന്ന് പഴങ്ങൾ സ്വതന്ത്രമായി നിലനിൽക്കും. ഈ വർഷം ആദ്യം നടത്തിയ പരിശോധനകളിൽ ജാപ്പനീസ് ഇൻസ്‌പെക്ടർമാർ പ്രവർത്തനപരമായ ക്രമക്കേടുകൾ കണ്ടെത്തിയതായി റിപ്പോർട്ടുകൾ സൂചിപ്പിക്കുന്നുണ്ട്. കർശനമായ ആരോഗ്യ മാനദണ്ഡങ്ങൾ പാലിച്ചുകൊണ്ട് വിദേശത്തേക്ക് കയറ്റുമതി ചെയ്യുന്ന അൽഫോൻസോ, കേസർ, ലാംഗ്ര, ബംഗനപ്പള്ളി തുടങ്ങിയ വലിയ പ്രീമിയം ഇനങ്ങൾക്കാണ് ജപ്പാൻ നിരോധനമേർപ്പെടുത്തിയിരിക്കുന്നത്.

2026 മാർച്ച് 25 ന് ശേഷം സാക്ഷ്യപ്പെടുത്തിയ മാമ്പഴ ചരക്കുകൾ ഇനി സ്വീകരിക്കില്ലെന്ന് അധികൃതർ ഇറക്കുമതിക്കാരോട് പറഞ്ഞതായി റിപ്പോർട്ടുണ്ട്. രണ്ട് പതിറ്റാണ്ടിനിടയിൽ ഇന്ത്യൻ മാമ്പഴ ഇറക്കുമതിയിൽ ജപ്പാൻ ഏർപ്പെടുത്തിയ ആദ്യത്തെ വലിയ നിയന്ത്രണമാണിത്. പഴ ഈച്ച മലിനീകരണ ഭീതിയെ തുടർന്ന് നേരത്തെയും സമാനമായ ഒരു നിരോധനം ഏർപ്പെടുത്തിയിരുന്നു. പിന്നീട് ഇന്ത്യ അതിന്റെ സംസ്കരണ, സർട്ടിഫിക്കേഷൻ സംവിധാനങ്ങൾ മെച്ചപ്പെടുത്തിയതോടെ 2006 ൽ അത് പിൻവലിക്കുകയായിരുന്നു. ജപ്പാൻ ഒരു സീറോ ടോളറൻസ് നയമാണ് പിന്തുടരുന്നത്. പ്രത്യേകിച്ച് പഴ ഈച്ചകൾ, അവരുടെ കാർഷിക മേഖലയ്ക്ക് അപകടകരമാണെന്ന് കരുതുന്നു. പ്രാദേശിക വിളകൾ സംരക്ഷിക്കുന്നതിന് രാജ്യത്ത് കർശനമായ ക്വാറന്റൈൻ നിയമങ്ങൾ നിലവിലുണ്ട്.