ആരാണ് ധ്രുവ് വിക്രം? അനുപമ പരമേശ്വരന്റെ ആരോപണങ്ങൾക്ക് ശേഷം ചർച്ചയാവുന്ന നടൻ

നടി അനുപമ പരമേശ്വരൻ (Anupama Parameswaran) തന്റെ വേദനിപ്പിച്ച പ്രണയബന്ധത്തെക്കുറിച്ച് നടത്തിയ വെളിപ്പെടുത്തൽ സമൂഹമാധ്യമങ്ങളിൽ വലിയ ചർച്ചയായിരിക്കുകയാണ്. അനുപമയുമായി നേരത്തെ പ്രണയത്തിലാണെന്ന് അഭ്യൂഹങ്ങൾ പ്രചരിച്ചിരുന്ന തമിഴ് നടൻ ധ്രുവ് വിക്രമുമായി പലരും ഈ വെളിപ്പെടുത്തലിനെ ബന്ധിപ്പിക്കുന്നുണ്ട്. ഈ സാഹചര്യത്തിൽ ധ്രുവ് വിക്രമിനെയും അദ്ദേഹത്തിന്റെ സിനിമാജീവിതത്തെയും പരിചയപ്പെടാം
ആരാണ് ധ്രുവ് വിക്രം? 1995 സെപ്റ്റംബറിൽ ജനിച്ച ധ്രുവ് വിക്രം, നടൻ വിക്രമിന്റെ മകനാണ്. തെലുങ്കിലെ ഹിറ്റ് ചിത്രം ‘അർജുൻ റെഡ്ഡി’യുടെ തമിഴ് റീമേക്കായ ‘ആദിത്യ വർമ്മ’യിലൂടെയാണ് ധ്രുവ് സിനിമയിൽ അരങ്ങേറ്റം കുറിച്ചത്. വിജയ് ദേവരകൊണ്ട അവതരിപ്പിച്ച നായക കഥാപാത്രത്തെയാണ് തമിഴ് പതിപ്പിൽ ധ്രുവ് അവതരിപ്പിച്ചത്. അരങ്ങേറ്റ ചിത്രത്തിന് പിന്നാലെ 2022ൽ പുറത്തിറങ്ങിയ ‘മഹാൻ’ എന്ന ചിത്രത്തിലും ധ്രുവ് വിക്രം അഭിനയിച്ചു. കാർത്തിക് സുബ്ബരാജ് സംവിധാനം ചെയ്ത ചിത്രത്തിൽ പിതാവ് വിക്രമിനൊപ്പമാണ് ധ്രുവ് വേഷമിട്ടത്. വിക്രം നായകനായ ചിത്രത്തിൽ അദ്ദേഹത്തിന്റെ മകനായാണ് ധ്രുവ് എത്തിയത്. ഇരുവരുടെയും പ്രകടനം പ്രേക്ഷകശ്രദ്ധ നേടിയിരുന്നു (തുടർന്ന് വായിക്കുക)
ധ്രുവ് വിക്രമിന് സംഗീതത്തിലും താൽപര്യമുണ്ട്. അഭിനയത്തിന് പുറമെ ഗായകനായും ഗാനരചയിതാവായും അദ്ദേഹം പ്രവർത്തിച്ചിട്ടുണ്ട്. ‘വർമ’, ‘മഹാൻ’ തുടങ്ങിയവയാണ് അദ്ദേഹത്തിന്റെ ശ്രദ്ധേയമായ ചിത്രങ്ങൾ. എന്നാൽ മാരി സെൽവരാജ് സംവിധാനം ചെയ്ത ‘ബൈസൺ കാലമാടൻ’ ധ്രുവിന്റെ കരിയറിലെ പ്രധാന ചിത്രങ്ങളിലൊന്നായി മാറി
ധ്രുവിന്റെ സിനിമാജീവിതത്തിലെ നിർണായക ഘട്ടമായിരുന്നു ‘ബൈസൺ കാലമാടൻ’. അനുപമ പരമേശ്വരനും ചിത്രത്തിൽ പ്രധാന വേഷത്തിലെത്തുന്നു. കബഡിയുടെ പശ്ചാത്തലത്തിൽ കഥ പറയുന്ന സ്പോർട്സ് ഡ്രാമയാണ് ചിത്രം. ‘പരിയേറും പെരുമാൾ’, ‘കർണൻ’ തുടങ്ങിയ ചിത്രങ്ങളിലൂടെ ശ്രദ്ധേയനായ മാരി സെൽവരാജാണ് ‘ബൈസൺ കാലമാടൻ’ സംവിധാനം ചെയ്തത്.
എന്താണ് അനുപമ പരമേശ്വരൻ ആരോപിച്ചത്? ‘ഐ ആം വിത്ത് ധന്യ വർമ്മ’ എന്ന പരിപാടിയുടെ സമീപകാല എപ്പിസോഡിലാണ് ഒരു പ്രണയബന്ധത്തിനിടെ താൻ ‘നാർസിസിസ്റ്റിക് അബ്യൂസ്’ നേരിട്ടതായി അനുപമ പരമേശ്വരൻ വെളിപ്പെടുത്തിയത്. അമിതമായ ആത്മരതിയും നിയന്ത്രണ സ്വഭാവവുമുള്ള പങ്കാളിയിൽനിന്ന് നേരിടേണ്ടിവരുന്ന മാനസിക പീഡനത്തെയാണ് ‘നാർസിസിസ്റ്റിക് അബ്യൂസ്’ എന്ന് വിശേഷിപ്പിക്കുന്നത്.
എന്നാൽ, ആ വ്യക്തി ആരാണെന്ന് അനുപമ വെളിപ്പെടുത്തിയില്ല. സമൂഹമാധ്യമത്തിൽ താൻ പങ്കുവെച്ച കുറിപ്പ് പെട്ടെന്നുണ്ടായ വികാരപ്രകടനത്തിന്റെ ഭാഗമായിരുന്നില്ലെന്നും അവർ വ്യക്തമാക്കി. താൻ നേരിട്ട അനുഭവങ്ങളെക്കുറിച്ച് തുറന്നുപറയാൻ മാനസികമായി തയ്യാറാകുന്നതുവരെ കാത്തിരുന്ന ശേഷമാണ് അതേക്കുറിച്ച് സംസാരിച്ചതെന്നും അനുപമ പറഞ്ഞു
ആ കാലഘട്ടം വൈകാരികവും ശാരീരികവുമായി ഏറെ ബുദ്ധിമുട്ടുകൾ നിറഞ്ഞതായിരുന്നുവെന്ന് ‘പ്രേമം’ എന്ന ചിത്രത്തിലൂടെ ശ്രദ്ധേയയായ നടി അനുപമ പരമേശ്വരൻ പറഞ്ഞു. താൻ പതിയെ തന്നെത്തന്നെ നഷ്ടപ്പെടുന്നതുപോലെയായിരുന്നു അനുഭവമെന്നും അവർ വ്യക്തമാക്കി. “ഞാൻ ചുരുങ്ങിപ്പോകുന്നതുപോലെ തോന്നി,” എന്ന് പറഞ്ഞ അനുപമ, ആ സമയത്ത് ശരീരഭാരം ഗണ്യമായി കുറഞ്ഞതായും വെളിപ്പെടുത്തി
നാർസിസിസ്റ്റിക് അബ്യൂസിനെക്കുറിച്ച് നടി മഡോണ സെബാസ്റ്റ്യൻ പങ്കുവെച്ച ഇൻസ്റ്റഗ്രാം റീൽ കണ്ടതോടെയാണ് വിഷയത്തെക്കുറിച്ചുള്ള തന്റെ ധാരണ കൂടുതൽ വ്യക്തമായതെന്ന് അനുപമ പറഞ്ഞു. ആ ചർച്ച തന്നെ ഏറെ സ്വാധീനിച്ചെന്നും ശാരീരികമായി വിറയ്ക്കാൻ തുടങ്ങിയെന്നും അവർ ഓർത്തെടുത്തു
“ഇതിന്റെ ആദ്യ വിഭാഗത്തിൽപ്പെടുന്നത് ഇത്തരം പീഡനങ്ങൾക്ക് ഇരയായവരും മറ്റൊരാൾ ഇത് അനുഭവിക്കുന്നത് നേരിൽ കണ്ട കുടുംബാംഗങ്ങളും സുഹൃത്തുക്കളുമാണ്. രണ്ടാമത്തെ വിഭാഗത്തിൽപ്പെടുന്നവർക്ക് ഇതേക്കുറിച്ച് വ്യക്തമായ ധാരണയില്ല. ഒരുപക്ഷേ അവർ ഈ പദം കേട്ടിട്ടുണ്ടാകാം. എന്നാൽ അതിനെക്കുറിച്ച് കൂടുതൽ അന്വേഷിക്കേണ്ട സാഹചര്യം അവർക്കുണ്ടായിട്ടില്ല. മൂന്നാമത്തെ വിഭാഗത്തിൽപ്പെടുന്നവർ ഇതിനെ ലിംഗാധിഷ്ഠിതമായ വിഷയമായി കാണുകയും വെറും അനുമാനങ്ങളുടെ അടിസ്ഥാനത്തിൽ നെഗറ്റീവ് കമന്റുകൾ ഇടുകയും ചെയ്യുന്നവരാണ്. “എന്നാൽ, ഞാൻ സംസാരിക്കാൻ ആഗ്രഹിക്കുന്നത് മറ്റൊരു വിഭാഗത്തെക്കുറിച്ചാണ്. ഇത്തരം അനുഭവങ്ങളിലൂടെ കടന്നുപോയിട്ടും തങ്ങൾ നേരിട്ടത് എന്താണെന്ന് തിരിച്ചറിയാൻ കഴിയാത്തവരാണവർ. അതാണ് ഏറ്റവും അപകടകരമായ വിഭാഗം,” അനുപമ കൂട്ടിച്ചേർത്തു